星期一，Pro J先同TCL通訊（2618）高層見見面、吹吹水，一早同你哋講，「高層見傳媒，好事自然來」，股價飛升，當然因為轉勢加好業績！唔好話Pro J馬後炮，挑戰一年高位，都應該勢在必行，加上成個電訊、手提生產商板塊受惠資訊科技提升同消費者陣式轉移！連百老匯都有得賣佢哋嘅手機！睇住睇住啊！
另外，新銳醫藥（8180）如Pro J所料，配售加創仔，首日埋單升咗4.12倍，係意料之內，Pro J有幸出席佢哋嘅投資者推介會，氣勢一流，不同行家紛紛畀面現身，冇理由上市幾棍就玩完。新銳減咗上市費用嘅PE得8.4倍，仲係細細隻、有得炒！
遊戲遍佈逾30國家
國內證券行正式全速研究T+0嘅結算方案，電子金融全球一體化乃大勢所趨，無可避免！我嘅愛股國泰君安（1788）同中信証券（6030），係時候可以放入名單，準備落鑊炒一轉！
網絡遊戲新股又來了，內地最大棋牌類開發營運商博雅正式招股集資！博雅將會喺11月掛牌，如果Pro J冇記錯，雲遊（484）係今年上市第一日最賺錢新股；另一方面，IGG（8002）升勢延續，為博雅呢位行家做好個勢！
博雅2004年喺內地成立，員工大約有600幾人，出品包括博雅德州撲克、鬥地主、麻雀同象棋等十幾款休閒遊戲，而佢哋嘅game已經進入咗韓國、日本同美國等超過30個國家，用戶以億計，都咪話唔犀利！
雖然內地兩大商業銀行好似「雙龍出海」咁夾實博雅，但係博雅整招「電光毒龍鑽」都唔係揸流攤，網遊概念又可以再加多招「飛龍在天」，哈！
繼續追蹤，出發！
徐燦傑
中國銀河國際財富管理主管
本欄逢周三刊出
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24