中環迷你裙:股壇舞會必殺技 - Samantha

中環迷你裙:股壇舞會必殺技 - Samantha

讀書時嚴禁clubbing,年尾的周年舞會是獨身男女的最後機會,否則就要唱lonely christmas!回想ball場上,高質素未必穩贏,因為靚女多信奉有麝自然香,堅守淑女形象,喜愛壓軸出場,冇錯!好似演唱會嘉賓咁隆重登場,可惜嗰陣已成雙成對,只好唱獨腳戲。
股壇舞會今年主題是科網、濠賭,要入局就要夠sociable,令投資者知你存在,同及早展示身價,事關音樂椅完結之時,縱然花枝招展,投資者只能同你講聲「下次請早」。
昨日一眾科網板塊現散水迹象,中彩網通(8071)話可能收購手遊公司,星辰通信(1155)又話開拓數字專網系統業務,僅得到冷冰冰回應。
恒指騰騰震,H指昨日成唯一求生通道,大家猜度阿爺心思,諗住於三中全會概念上撈點油水,咁辛苦搵板塊,倒不如炒一度落難的水泥股。
受惠於全國水泥價格連升三周,加上踏入水泥旺季,以及基建投資有望加快的憧憬下,安徽海螺(914)是首選,啱啱公佈的業績顯示季度增長速度加快,上季純利為23.2億人仔,按年大增1.3倍;海螺在水泥板塊行得慢,但較穩陣,有得炒落後。

Samantha
本欄逢周一、三、五刊出

鄭中基@谷德昭搞笑孖寶再發功,笑彈繼續嚟!
周一至周五《亂噏24》約定你: http://bit.ly/appletalk24