美國老友B可能會在年尾回港一行，來電郵話佢好鍾意香港美食，上網（TripAdvisor）睇到香港排名前十名（Top10）嘅餐廳，本想一一試勻，但一定唔夠時間，問左丁山有邊三至四間「必去」。左丁山係大鄉里，未上過TripAdvisor網站，不知十大「名店」係乜乜，唯有上網望一望，呢個網站真唔真呀，於4015間（咁多？）香港餐廳中選出排名榜！頭十名係：（一）Caprice（四季酒店之米芝蓮三星餐廳）、（二）壹點心、（三）港灣道一號（君悅酒店）、（四）Amber（置地文華酒店）、（五）Domani（太古廣場）、（六）文華酒店扒房、（七）Trattoria、（八）Aqua Roma、（九）Giando、（十）Panda Burger。
十大之中左丁山只係去過第三、四、五、六名共四間，第一名Caprice幾乎永遠卜唔到位，已經放棄，其他全未去過，無以置評，於是回覆老友B，食中菜，港灣道一號唔係最好，個人認為同在一條街嘅「滿福樓」更勝一籌，食西餐，Amber與文華扒房好則好矣，價錢稍高，如果唔係來港為吃心頭好，不惜腰間錢嘅話，不如就試吓排第五嘅Domani（意大利菜），起碼物有所值，吃了不會嗌肉痛先，何況呢間餐廳位於平台，門口可以停車落客（但不准泊車），樓底特高，全落地玻璃讓自然陽光照明整個地方，藝術B去過，就大讚設計簡單純樸，令人客坐喺裏面，可享受閒情逸致㖭。
講飲講食令人心花怒放，但食飯時候睇「亞洲週刊」講香港電視風暴，怒氣油然而生。特區政府所有官員與高層死都以「循序漸進，行會保密」為理由，拒絕說明點解王維基嘅香港電視攞唔到牌，但與此同時，政府就猛派消息人士向與政府友好傳媒放料，抹黑王維基。新聞處長黃偉倫係忠心公僕，冇咁低莊啩？究竟邊啲先至係梁先生身邊嘅人，大舉放料呢？呢次「亞洲週刊」又猛咁引述「高層人士」之言，指王維基不懂如何申請電視牌照，要搞30條頻道，多到不合理，發出牌照會釀成惡性競爭，並且話「會不會有人願意賠本去做呢？如果有就不是商業行為了，一定有政治動機。所以政府要負責任的發牌……」高層人士假定王維基一定虧本，唔知佢睇唔睇到亞視事實上虧本多年呢？亞視嘅政治動機又係乜呀？