福臨門黨回歸後充斥特區建制，難道英治時代，就冇英國外交部、內閣大臣、執政黨元老、唐寧街十號老友在香港招搖過市搵政治酬庸？當然有，但不會成功，港英政府倚重之建制力量，頂多來港「揼心口」，為執政黨籌款。
英人就地而治，所起用嘅建制派，有一定人事標準，而且仲有衡工量值，絕少霸住兩局職位又唔使deliver嘅本土政客。
原因唔係港督IQ比華人特首高，而係英人行事，有規有矩，有賞有罰，加上自己人任港督，毋須安插龐大英倫信任之親英政客「協助」港督執政，92年肥彭來港履新，帶住兩個助手大細龜黎偉略與戴彥霖，一開波內部討論政改，本土建制力量以李鵬飛、何承天、范太為首的自由黨反對向北京開戰，肥彭二話不說，指示鄧蓮如解散行政局，將自由黨全部清場，絕不拖泥帶水。
鄧蓮如當然高林煥光幾班，從未曾公開表示解散行政局重組乃港督一人的決定，與自己無關。
當日嘅行政局比今日行政會，仲似一個執政內閣，𠵱家學人講內閣保密制及集體負責制，不過係鸚鵡學舌。
內閣係執政首相挑選入閣，又或是聯合政府內其他黨派協商推舉入閣，唔會好似香港咁白癡，毫無邏輯可言，既非執政黨戰友同志，亦非聯合陣線，而係各方勢力篤個keeper入去，𥄫住個特首，試問又有幾多人會視自己與執政團隊乃命運共同體，答案係一個都冇。
行會淪為抽水好地方
行會不過是抽取個人政治資本的好地方，梁振英上屆坐行會，自己在房屋及扶貧政策上，為討好民意，屢次犯規發表自己睇法，最終被曾蔭權發信警告，但曾亦無法將佢清除，原因好簡單，佢背後有人照。
時至今日，重要公職如果真係要做事，都係搵番一班港英年代培植嘅建制中人，貿發局蘇澤光與機管局張建東再坐多一年，為咗卡實個位，唔畀梁粉金主上，為乜？係人都知有啲位若當作政治酬勞，香港會好Q大鑊。北京回歸前前後後加埋近30年，培育出一班政治寄生蟲，你以為靠佢，點知佢靠番你。北京為培植自己人，投放人力物力資源，遠超過英治時代，錢花咗冇所謂，強國大把，但越搞越衰，先令人心傷。
其實，講到尾，大家都係輸家！
添馬男
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24