指數睇落冇事，個股已跌到內傷，由普通病房轉入深切治療部。跌市三大病徵齊全：一、強勢股（科網、濠賭）散水；二、垃圾股升到亂七八糟；三、跌市成交增、反彈交投減。目前市況下，如手握九線神仙股，當然格殺勿論；但如果係業績良好的基金股呢？
昨有戰友問道，22蚊買入金山軟件（3888），應唔應該走？睇圖短炒，前日跌穿21蚊已經要走人，去到19蚊先定去留，就應該問自己：唔走的話，假設再跌落17、16蚊，有冇耐性或實力堅守？如果答案是否，不如止蝕算了。如有本錢溝一至兩注，都應等見底訊號出現先加注，而非每跌一棍就接貨，否則彈藥好快用完。
魏力見過某君1蚊時聽到有隻股會爆升，飛身撲入，點知隻股馬上就跌，佢每跌一棍就接一點，溝到6毫子，最後壓力爆煲，5毫子全部止蝕，隻股就四毫七見底反彈。盲溝是炒股大忌，要戒。
國企陸續公佈季績，個別表現唔差，兗州煤業（1171）首三季雖然仍蝕6億人仔，但第三季勁賺18億人仔，加上近日煤價回升，全年隨時可能扭虧，難怪能逆市呈強。10日線近日升穿20日線，反映走勢好轉，MACD快轉為雙牛，但建議待突破三個月高位8.37元始買入，否則仍視作橫行上落。
魏力
http://www.facebook.com/2012jason
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24