【電視大戰之全城響應】受夠了，我們真的受夠了！當港人長期飽受爛劇煎熬，以為香港電視會帶來希望之際，卻因為政府的黑箱作業而幻滅，想不到港人連欣賞免費電視的選擇權也被抹煞。網民發起「全港熄電視日」，於明晚7時至11時熄電視，以行動作出控訴。本報記者近日訪問了藝人及街坊，大部份人都支持今次行動，並趁這段時間與家人共聚，享受天倫之樂。
撰文：馮國康
林峯：
如果要引起關注正視呢件事係啱嘅，畀觀眾多個選擇權係啱嘅。𠵱家啲人太宅男宅女、太依賴電子科技。以前讀書我哋成日出去打波，呢件事令大家再健康啲。
佘詩曼：
我嗰日返咗內地，不過都支持行動，應該有個公開公平嘅解釋。嗰晚出街囉，睇書或者打機，好似我咁畫吓畫，帶狗仔散步，出街食飯或者睇場戲。
張可頤：
可以熄咗電視，但幻想個電視播緊自己喺香港電視嘅劇，或者行街、同朋友食飯，對我影響唔大。
蒙嘉慧：
唔睇電視都有好多嘢做，可以打機、約朋友食飯或者去做運動。不過嗰日我可能唔喺香港，可能睇緊第二個國家嘅電視。
蔡卓妍：
我好少開電視，有時睇電視令屋企人少咗溝通，趁嗰個時候傾吓偈，交換吓近況。
鍾嘉欣：
一家人煮嘢食，同屋企人相處傾多啲偈。香港人太忙，唔需要做啲好特別好花巧嘅事。
周麗淇：
如果唔睇電視咪早啲瞓囉，早睡早起身體好嘛。
方力申：
我梗係響應同支持，唔睇電視咪去打籃球囉，啱啱好打到球場熄燈，或者約埋班朋友去釣墨魚，可以成班friends一齊支持。
艾威：
睇書囉，王維基先生介紹過我睇一本有關公義嘅書，嗰本書其實係大學嘅課程，今日自己居然要面對公義，好搞笑。
盧海鵬：
當晚我都唔喺屋企。如果熄電視可以去開工，我平時唔睇電視都去開工。
張松枝：
當然支持啦！到時我同太太、囝囝入戲院睇七點半，之後去食飯，享受家庭樂。
施南生：
當然會支持，熄電視之後我會睇劇本睇書。好心痛，香港已經好多年冇競爭，所以好耐冇乜人才出嚟。
郭可盈：
平時都好少睇電視，我會選擇陪囡囡，可以講故事畀佢聽。
張新悅：
自從有咗小朋友，都唔畀佢哋睇電視。我係超級環保嘅人，嗰晚熄晒電視熄晒燈，更珍惜資源。
陳嘉桓：
有時食飯唔開電視幾清靜，都幾好，或者出去做運動，揸車遊車河。
盧冠廷：
我支持發免費牌照，會響應呢件事。大家可以趁機做吓環保嘅嘢，又或者淋吓花。
林家棟：
我好少睇電視，但心態上係支持同響應。到時我應該喺公司做嘢。
黃婉曼：
好彩嗰個時段我唔喺電視入面出現，如果唔係就睇唔到我喇！唔睇電視，可以去街或者行公園，食飽飯唔好坐喺度！
鄭融：
如果能夠做一啲同屋企人互動嘅事，例如出街食飯或煮飯，好過睇電視。
葉熙祺：
如果啲人支持熄電視，可以趁萬聖節同朋友去主題公園玩餐飽，或者周圍派吓糖。
蔚雨芯：
我會拍啲片放上instagram，同大家講政府冇支持過演藝事業，做歌手唔容易！
街訪：市民齊聲打氣
就「全港熄電視日」，本報記者進行街訪，大部份人均表示響應。
黃小姐：
我一向唔多睇電視，如果大家嗰日熄電視都會支持，可以睇書，我都支持去政總嘅市民。
梁小姐：
熄電視我都支持嘅，不過我婆婆就未必，佢鍾意睇電視，嗰段時間我會用手機上網，或者睇書。
方先生：
我應該會響應，自己都關心呢件事，之前有去政總。嗰段時間會上網睇最新消息，睇吓有冇集會，發唔到牌好可惜。
全港熄電視日專頁： http://www.facebook.com/hknotvday
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange