細個打機，好鍾意玩啲密室逃脫game；估唔到近一年，香港真人版密室逃脫game開到周圍都係，久唔久就會喺fb見到人post「逃出成功」嘅相。
菲菲最近終於同朋友玩咗其中一間，即時明白點解呢類舖頭可以長開長有。菲菲去嗰間叫Mr.X，面積有22,000呎，分七間主題密室。之前聽講話呢間係全港最豪，入密室前，仲要懶嚴格咁，經過紅外線探測儀check你有冇偷帶電話入去，心諗：有冇咁勁呀。點知入到房，又自動密碼大門，又紅外線迷陣，仲要勁多機關，直頭好似拍特工片咁，場景極度誇張認真。
上網搵番資料，Mr.X一早已成為密室品牌，上海起家，上年6月開業，初期投資300萬人仔，幾個月就回本；仲要勁到現時天津、南京、廣州等地都有分店。
至於香港第一間港產「逃脫」品牌「逃出香港」，開業唔夠一年，就吸引咗10萬人玩。當初又係用100萬元資金創業，一個月就收支平衡。
查實香港人咁貪新鮮，呢類game只要定期換主題，應該仲可以流行多段時間。不過隨住有大brand以巨額投資香港開舖，行業競爭加劇，相信財力冇咁雄厚嘅舖頭，好快都要相繼逃出市場。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange