隨住今季美職聯進入季後賽，意大利「黃金一代」將又損一員，因效力蒙特利爾衝擊嘅尼斯達（圖）會正式掛靴。
站喺女性角度，國家隊嘅黃金一代，從來唔係以戰績計，而係以球員嘅靚仔度計。猶記得尼斯達嗰代嘅意大利國腳，集各類型男於一隊，後防有佢嘅好拍檔「小鋼砲」簡拿華路，中前場有王子托迪、金童迪比亞路、恩沙基同埋韋利，真係無論你係乜嘢口味，都總有一個啱心水。可惜，佢哋嗰代之後，以盛產俊男出名嘅意大利竟然無以為繼，睇番𠵱家呢支意大利，唔通要掩住良心話巴神同艾沙拉維好靚仔咩？
講番37歲嘅尼斯達，雖然佢喺94年效力拉素青年軍時，喺練習中踢斷英格蘭中場加斯居尼隻腳而響朵，但跟住佢嘅踢法就越嚟越成熟，仲被譽為現代足球其中一位踢法最優雅嘅後衞㖭！尼斯達今季效力衝擊，都替球隊上陣咗23場，同埋協助球隊殺入季後賽，不過佢就決定今季結束之後掛靴，向教波之路進發。至於佢最想執教邊隊？就係曾效力達10年嘅AC米蘭，果然靚仔又長情！文：吾中
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24