早禱會成員向外透露了重要機密，指梁振英表示現政府施政困境，在於朋友太多，戰友太少，好多人當笑話來聽，恥笑梁振英自我感覺良好，明明孤獨到冇朋友，又何來朋友滿天下呢？
其實，早禱會人多口雜，梁之說話係有感而發，但就冇詳細解說。
左右逢源 充斥建制內
梁本人乃孤獨精，從政30幾年都冇班底，何來戰友可言，而大量朋友，當然唔係特首個人朋友，而係打住建制派旗幟找尋政治酬庸嘅酒肉朋友，呢種朋友先至乞人憎。前政務司司長肥龍稱呼呢種朋友為「福臨門黨」，典故來自凡政務司設宴請客於「老福」，作政治游說，例必一大棚所謂建制派老友出席，當然少不免開靚紅酒、食好嘢。酒酣耳熱，官員交代所需工作，但凡涉及為政府公開站台背書，甚至對付反對派者，即所謂「劈友」，呢班政府朋友立即消失得無影無蹤，許仕仁遂稱之為福臨門黨，其涵意與梁振英慨嘆「朋友太多戰友太少」一樣，不過梁不脫中共幹部用語，而肥龍則一貫啜核抵死。
當今特區執政黨，並非民建聯，亦非共產黨，而係福臨門黨，黨員有大小功能組別、工商界、鄉事、西環契仔契女，所謂泛建制派聯盟，反而民建聯算做最有政治倫理，應承咗政府就死頂交足貨。福臨門黨中堅之西環友最多，佢哋認西環做大佬，而非特首，但凡要乜嘢勳銜、太平紳士、法定機構公職，都由西環開聲問特首攞，政治上賞割大權握在西環手中，大家毋須聽命於特首及三司。在老福食飽飯拍拍屁股走人，你又奈我唔何。但凡有爭議決策，又走出來抽抽水，投中產市民所好，獎金又要，獎品又要，左右逢源，呢種朋友，充斥特區政治建制內，令人煩厭，就如政治寄生蟲，揮之不去。
福臨門黨橫行現象，正反映一國兩制港人治港的政治體制太多bugs，運作不暢順之餘，隨時會爆炸。由於政治力量分散，政出多門，人人有後台，做特首邊有戰友可言，但做政府朋友就開心過癮得多，從來冇一個地方，做建制派可以hea得咁緊要。香港政治體制落後，不合政治邏輯，背後無合理性可言。而中央對本地建制政客亦無衡工量值可言，表現好唔好，只要表面乖乖，一樣可以穩坐釣魚船，特首換來換去，十幾年來還不是那一班福臨門黨，佢哋早已成精，吃透北京那一套。
香港政治之荒謬，猶如大家做保險公司CEO，但經紀唔到數，交唔夠quota，開唔夠單，十幾年來都唔會俾人郁。CEO冇權炒人，個個皇親國戚，喺董事會有人脈，日日照返工，糧照出，而且仲對外聲稱係你朋友，你話呢間公司點會有好業績。
添馬男
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24