垃圾股禾雀亂飛,唔少戰友都大呼無奈,表示頓失方向,追炒又驚中伏,唔跟又睇住係咁升。股市上最遙遠的距離,莫過於有隻股票升10%時,你發現咗佢而冇買,最後佢升咗一倍!
人性貪婪,想搵快錢是天性,難以避免,但炒細價股都要有策略,一係唔買,買就要起碼買夠五隻,分散注碼。幾日之後,結果可能係兩賺一和兩蝕,呢個時候,應將陣亡個兩隻止蝕,換入仲升緊嗰兩隻。過多幾日,可能得返一隻升,就將其餘注碼押埋落去。經驗所得,用呢個方法拉勻有賺的機會,遠比重注一隻賭大細為高。
阿信屋近日計劃由零食店轉營為日式超市,售價更平連鎖日式超市一大截。CEC國際(759)主席話,由於超市食品凍肉蔬果擺唔耐,毛利會低少少,無折為28%,有折則25%,但其實是除笨有精,拓展客源至家庭主婦,隨時可產生協同效應,帶挈零食銷量上升。
另外,主席表示截至10月底止半年,阿信屋營業額已達六億元目標,按年增長七成,但同期分店數目亦大升59%至176間,能否控制租金及物流成本,將為業績關鍵。
魏力
http://www.facebook.com/2012jason
有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange