千呼萬喚，創銀（1111）終於成功易手，作價相等於市賬率逾2倍，算是無大家早前吹到2.4倍咁勁，但亦絕對稱不上是便宜。有分析員指，根據慣例，亞洲區內銀行如有10%左右的ROE，其價值就大概是1倍巿賬率起跳；如要值2倍，一般ROE要有15%以上先叫合理。但香港銀行平均ROE只有10%至11%左右，創興的ROE更只得單位數。所以2倍市賬率這個作價，海迪唔知越秀集團是如何計得掂呢條數。
市場普遍認為，好似越秀呢種非銀行中資機構，透過併購來進軍銀行業，可利用阿媽的龐大綜合企業，內部轉介客戶搞cross-selling，推展跨境人民幣業務。鑑於有呢啲策略上的需求，所以越秀願意出多啲溢價，都叫講得去。但至於同樣放緊盤的永亨（302），雖然佢嘅質素、網絡都較創興優勝一大截，但作價要達2倍市賬率仍是非常高昂。而且據說𠵱家睇緊永亨的潛在買家，都是些地區性銀行為主，佢哋出價真係要計清楚回報，要同股東交代。所以創銀搞得掂，是否反映永亨都一定好事近？海迪會睇得審慎啲。
順帶一提，越秀今次能用「部份要約」的交易方法，奪得創銀控制權而又避開了全購，連股東會批准都唔使，關鍵是在於已答應賣股嘅大股東廖氏，持有創銀超過50%，呢個條件並不存在於永亨身上。故誰想打永亨主意，似乎要全購的機會都幾大，可要被「硬掘」400億元了。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange