好多人都將思捷（330）同I.T（999）比較，覺得兩間公司都係曾經風光一時，變為風光不再。
姑勿論兩隻股價跌到幾咁殘，但對於I.T主席沈嘉偉在時裝界的傳奇，不得不畀一個「讚」。
想當年，沈嘉偉同大把後生仔一樣開舖做老闆賣衫，但生意麻麻地，於是即刻改賣當時hit爆嘅Dr. Martens同Levi's，賺了第一桶金，為上市之路揭開序幕，成功將「不可能」變為「可能」。
力拓內地 引入韓國品牌
I.T成功之道，是引入歐洲、日本時裝，專攻中低價年輕人市場。只可惜，隨着近年韓風橫掃本港，潮人嘅特徵已唔再係東瀛風，加上太多日韓品牌都進駐香港，日本時裝唔再係I.T專利。
的確，今年I.T中期盈利大倒退77%，香港收入下跌7%至15.7億元。只不過，唔代表I.T已步向玩完嘅結局。
事實上，該公司早已率先打入大陸市場，上半年內地總收入升15%至9.33億元，表現明顯好過香港。
雖然內地同店銷售仍然下跌近2%，但已較首季下跌近6%有改善。加上，I.T又識得引入韓國品牌的化妝品，可見I.T不會坐以待斃。
該股發盈警、中期績差、兼被摩通唱淡全年或見紅，叫人減持並將目標降至2.2元後，股價都仲企得穩，昨收2.41元。
即將踏入聖誕新年勁減季節，I.T話唔定隨時谷底大反彈！
瑪姬兒
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24