剛過去嘅暑假，香港搞巴克萊亞洲賽，點知香港大球場因為天雨變成大爛場，成為國際笑話，雖然大球場草地質素冇乜保證，但似乎冇咩影響歐洲球隊訪港意欲；我求大俠收到風，除咗德甲球隊漢堡外，今季表現回勇嘅英超老牌球會利物浦，原來已計劃2015年夏天，再嚟香港踢季前熱身賽。
07年曾來港獻技
利物浦對上一次嚟香港已經喺07年嘅巴克萊亞洲賽，當年同紅軍一齊嚟嘅仲有富咸同樸茨茅夫，最後紅軍決賽輸畀已降落英乙嘅老樸。利物浦幾季前轉咗渣打銀行贊助，據悉，喺香港上市嘅渣打同紅軍傾贊助條件時講明，會安排紅軍嚟香港同球迷見面，呢個承諾似乎有機會喺2015年實現。
足總主席梁孔德早兩日同我求大俠講，利物浦已經同香港足總接觸，話有興趣喺2015年夏天嚟踢表演賽。紅軍過去幾年都喺單數年到亞洲進行季前集訓，2011年去咗廣州、吉隆坡同南韓，今年13年就去咗曼谷、印尼同澳洲，15年嚟香港真係好正路喎。
香港利物浦官方球迷會會長阿舜就話︰「英超隊隔年都會嚟亞洲，輪住去東南亞唔同嘅地方；下年世界盃年就預咗唔會嚟，所以我哋季初已經估到球隊2015年會嚟香港。如果成事嘅話，球迷都會好開心咁去一睹利物浦嘅風采，希望到時可以拎住隻英超獎盃嚟啦！」梗係，今年紅軍戰績不俗，剩係睇蘇亞雷斯同史杜列治呢個「新SAS」都抵晒啦。
漢堡歇冬想約戰南華
另外，南華足主羅傑承日前透露，德甲漢堡派代表嚟港探訪南華，原來德甲球會好注重亞洲市場，希望今季歇冬期間約戰南華。羅傑承仲話，漢堡隊中有位香港球員林志堅，如果漢堡到時同南華踢友賽的話，球迷就可以一睹呢位父親係港人嘅混血兵踢成點。佢仲話，德國球隊只有1月歇冬、5月球季之後，又或者7月季前呢3個時間比較可行，到底成唔成事，睇嚟仲要雙方再作研究。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange