「佔領中環！好大件事呀！動搖營商環境呀！擾亂社會秩序呀！拖累民生呀！法治不保喇！巧京京呀！」八個左派工商界商會噚日一共派出17位頭目，一字排開好似做文革樣板戲咁，每個人被迫發出最後怒吼反佔中。點知呢班工商界精英怒吼完就即刻畫上句號，只有五分鐘嘅發佈會不設提問環節，講完嘢就雞咁腳鬆人，好明顯佢哋目標觀眾群，係西環同北京囉。
噚日中環有單香港工商界發表聯合聲明嘅採訪活動，由中華總商會會長楊釗率領來自八個商會嘅頭目，包括廠商會施榮懷、吳永嘉、林大輝、工業總會劉展灝、總商會周松崗、袁莎妮、地產建設商會梁志堅、中國企業協會、中華出入口商會、中國商會等代表。個牌頭份量十足，點知虎頭蛇尾。
成班商界一開始似足影學生班相咁，分兩行一前一後手擺後面，由「班長」楊釗宣讀反佔中聲明，抹黑佔中引入外來勢力，不滿有人同台獨分子見面，成班人憂國憂民咁款，聲明離不開「憂慮、反對、不認同、不贊同」熟口熟面嘅字眼，識填充題或重組句子嘅話，係五毛都識寫。八方現場所見，總商會周松崗笑容牽強，似係言不由衷。
楊釗讀完個聲明兼影完相後，成班商界速逃，係咪要趕住去西環報告「任務完成」？還是堂堂工商界精英，被迫講埋啲咁嘅膠嘢，實在冇面見人呢？無論記者點追問，都係徒勞無功，因為公關大員早已準備好升降機，一㩒掣即時送走佢哋。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange