噚日嘅一個記者會，令八方思考咗一個哲學問題，究竟乜嘢叫做正義？乜嘢叫做政治？喺呢個咁邪惡嘅世道之下，無端端有班充滿「愛與關懷」嘅西裝友，book定酒店宴會廳開壇，又玩拔劍、又有鼠王芬助拳，宣佈成立「正義聯盟」，話要參與社會服務、教育事務、經濟同政事，又要為社會不公義發聲，簡而言之，即係成個香港佢玩晒！
邊個咁把炮？聯盟嘅揸fit人就係香港家長聯會會長李偲嫣。私煙BB撐國教、反同性戀、喺旺角拖馬聲討林老師，連退休警司都現身支持，「正義」指數真係爆晒燈㗎。咁為咗「正義」，佢老人家會有乜搞作呢？佢哋首先嚟個大笪地式嘅拔劍儀式，同場加映鼠王芬「正義監誓」。
禮成後，私煙BB話組織因正義而起，正義而立，「唔講政治」，日後會搞藝術同足球等培訓運動，更重要係，佢哋會籌備「愛與關懷反佔中工作小組」，實行用「愛與關懷反佔中」喎。港視不獲發牌問題，佢哋都好關注㗎，私煙BB話可以擺檔幫港視員工搵工喎。
「正義」朋友要反佔中，佔中發起人戴耀廷驚唔驚呢？阿戴回應話：「佢鍾意做咪做囉，呢個世界有西施亦都有東施。」
李八方
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange