所謂男人的感慨，和專一比賽的講法，本來已經講中好多麻甩佬心事，但前兩日目睹一場室內閉門嘅港甲「生死大戰」之後，我相信基頓同伊達心目中諗到嘅可能係另一句歌詞──男人的感慨，同師弟比賽……因為兩位昂藏六尺森巴大男人，竟然比兩個90後玩到坐立不安，最後仲要做埋牛牛俾人坐㖭。
多得有心人高登廷峯日以繼夜悉心炮製嘅港甲patch，令到我哋香港地打FIFA時可以支持番香港波，於是就搵來飛馬同東方兩隊，派出佢哋陣中自認最好波嘅代表出戰。東方派出巴西雙寶，而飛馬就有齋睇樣都似係機神嘅袁皓俊同陳柏衡。其實未埋位前我諗住基頓係大熱，因為兩年前見過佢打機已經唔係後衞咁簡單，見人過人係佢真正身份。點不知一埋牙，團體戰飛馬先贏一場，勉強畀你話有藉口因為Game入面嘅數值飛馬高好多（唔知係廷峯個人口味定真係咁反映現實），但之後個人對戰，伊達同基頓用番晒世界勁旅曼城車仔呀咁，一樣照輸畀袁皓俊小朋友，拳怕少壯係球壇真理，睇吓兩位森巴佬之後可唔可以響球場報番仇啦，眼見佢哋兩位名將慘被小將騎背脊仲要做push up時好似想噴火咁，呢鋪可能係一個好好嘅激勵。
喺旁邊做塘邊鶴，特別留意呢啲球員用番自己時有乜特別，結果係冇乜異樣。伊達用番自己射罰球時，仲冇真人咁煞食，可能由於樣貌設計有限制，佢分分鐘唔知嗰個係自己。反而比利時前鋒盧卡古最近就公開表示不滿，話FIFA入面嘅自己速度太慢，呵呵。又據陳柏衡透露，佢有位外援球員好鬼happy，因為Game入面佢嘅數值仲勁過佢家鄉嘅國家隊球員，搞到佢突然自信爆棚，咁唔該之後喺球場上證明吓自己嘞。
最近一套講賽車嘅電影《一級雙雄》，被網友稱為男人的終極浪漫，故事就係講當年F1嘅真人真事。所謂神級對手，勝過豬般隊友，戲中兩位大男人由狗咬狗骨到惺惺相識，平實得嚟嗒落有味就如一碟豆腐火腩飯，敗不大悲，勝不大喜，冇番咁上下經歷都唔容易嚟到呢個境界。有冇人識繙譯豆腐火腩飯做葡文講畀伊達同基頓聽，等佢哋明白男人的感慨，其實可以好浪漫。
KEYMAN
now TV主持
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24