劉德華近日拍攝短片為前晚在政總集會的香港電視員工打氣，感動不少市民及網民，紛紛封華仔做「劉特首」、「民間特首」，更希望華仔可做真正的特首，而圈中人亦議論紛紛。黎諾懿、郭少芸及徐榮等無綫劇集《愛．回家》演員昨日於葵芳宣傳劇集，對於華仔被高呼做劉特首，諾懿說：「如果佢（華仔）或者郭富城做特首我都支持，華仔平時keep到自己好fit，係意志好強嘅人，好克己，對事物要求應該好高！」諾懿亦表示支持發牌：「咁樣可以百花齊放，多咗選擇未必對公司有壞影響。」
另一邊廂，黃翠如昨日在銅鑼灣出席活動，對於民間特首華仔也撐港視時，她說：「能夠表達自己，做自己鍾意做嘅嘢，係一件好幸福嘅事，我自己想講嘅喺心裏面講咗。」翠如BB指很多香港人跟她一樣，覺得華仔做人處事認真，態度積極，對於華仔發聲發揮其影響力，翠如BB覺得好，她說：「每個人可以表達自己聲音、睇法，呢樣嘢係幾珍貴，作為香港人，我覺得好好。」可望華仔做特首？翠如BB說：「我一直都好欣賞佢，我諗冇人唔想，但我諗佢唔會參選，今時今日香港政府係最困難嘅工作。」
採訪：王連連、張俊銘
攝影：黃文偉
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！