【銅鑼灣利園】現年34歲嘅諸葛紫岐（Marie）懷孕七個月，早前出席活動現出幸福雙下巴，同埋一隻六卡嘅鑽石戒指，叫佢做幸福人妻真係當之無愧。Marie嘅預產期雖然係新年前後，但已經幫BB入定唔少貨，之前去加拿大安胎時就俾人發現買咗好多男仔BB用品，似乎有所暗示。
着平底鞋
前日Marie又同老公薛嘉麟拍拖出巡，下晝4點鐘佢哋去咗銅鑼灣利園商場二樓專賣BB仔用品嘅樓層行街，薛嘉麟好細心全程拖實老婆，而平時出親活動都着高踭鞋嘅Marie就少有咁着住平底鞋，佢哋逐間店舖睇，不時交換意見，最後喺Mothercare買咗一袋就離開。臨走前薛嘉麟先叫司機開架車去門口，以免大肚婆落到樓仲要等，大約五分鐘後佢就拖實老婆搭扶手電梯，全程十隻手指冇分開過。
落到地面Marie見到記者影相，佢反而好細心叫記者「小心啲後面呀」，行到停車處薛嘉麟快步行先兩步照顧太太上車。一向醉心日本動漫麵包超人嘅Marie，不忘喺車廂擺一兩件麵包超人擺設，唔知第時BB出世會唔會將佢扮成麵包超人呢？
採訪、攝影：梁繼光
鄭中基＠谷德昭搞笑孖寶再發功，笑彈繼續嚟！
周一至周五《亂噏24》約定你： http://bit.ly/appletalk24