【本報訊】昨晚約80藝人湧到政總撐香港電視，除港視藝員蒙嘉慧、張可頤、唐寧、郭鋒、林嘉華、梁小冰、元華、艾威、周家怡、楊淇、黃日華女兒黃芷晴外，郭可盈亦現身撐老公林文龍，秦沛就由內地趕返港撐兒子姜文杰及女兒姜麗文，何思諺更抱着兒子站台，令晚會凝聚家人的團結力量。
秦沛：希望有日拍番套
郭可盈昨晚首現身政總撐老公林文龍，她說：「自己想求公義，政府成日話培育新人，點解𠵱家有地方唔培育，點解要打碎？」林文龍則說：「其實要講都講晒，𠵱家剩番憤怒，想政府知市民要乜嘢，決策上錯誤要解釋，大家都想求答案。」跟林文龍合拍劇集《天網》的蒙嘉慧上台分享：「套劇有15集未拍晒，要求好高，劇本好難記，有日開工燈光師問我睇晒劇本未？我好慚愧，只係睇到13集，佢就睇晒因為要打燈。」可惜該劇因港視不獲發牌而叫停。蒙嘉慧眼紅紅嗚咽說：「我知唔update會俾人淘汰，有競爭先有進步，點解唔畀我哋進步？」
秦沛由內地返港撐子女，他上台說：「我喺影圈到今日已經65年，讀完書想入行，爸爸話只要唔怕辛苦、勤力同準備好就得，到我仔女畢業想入行，我都係講呢三個條件，我𠵱家怪自己唔識做人爸爸，我教嘅嘢同香港政府完全相反……大家睇到劇集片段，我從影咁多年，可以講質素係冇輸過比咁多間電視台，最遺憾我冇參與港視劇集，希望有朝一日拍番套。」
張可頤繼周日遊行後，昨晚再現身撐場，「自己同港視係部頭約，拍完劇後文字上合約完咗，精神上合約緊緊扣住，我覺得香港電視精神就係香港人精神，香港人精神就係我精神，希望政府注意，大家都想知真相，要保留香港核心價值，公平公正透明，面對呢個狀況好心寒」。拍《四年B班》的郭鋒領小演員上台，他說：「劇集係好高水準，媲美當年經典《The Sound Of Music》。」其中一位小演員說：「王維基同學，我知道好多人想睇，希望你擺上網。」全場拍手支持。
而港視藝員伍慧珊上台分享時，聲淚俱下說：「好悲傷，我今日出嚟係為理想同公義。」港視第一期藝員訓練班莊兆麟亦哭着說：「我哋唔會放棄，做人冇夢想同鹹魚有乜分別。」
鄭中基＠谷德昭搞笑孖寶再發功，笑彈繼續嚟！
周一至周五《亂噏24》約定你： http://bit.ly/appletalk24