【隔牆對論】
上月初，譚凱邦、范國威及毛孟靜發起《抗融合 拒赤化 反盲搶地》 的聯署廣告，控訴自由行破壞秩序，以及雙非爭奪資源，提出了「源頭減人」論，令新移民頓成眾矢之的，因而在網上觸發一場持續了個多月的「左右膠戰」。
「快樂左膠」、浸大社會學系研究助理教授陳允中狠批，源頭減人論針對弱勢社群，他主張單程證不設限。「右膠男神」立法會議員范國威反駁，要求減少輸入人口不等於針對新移民，強調要爭取單程證審批權。
記者： 朱雋穎 姚國雄
記：《蘋果》記者
陳：浸會大學社會學系研究助理教授陳允中
左膠批評這廣告歧視新移民：「回歸至今，每天約150人，已有超過70萬內地人取得單程證來港定居，因此港人的平均居住面積越來越小。一個負責任的政府應取回單程證審批權，減少輸入人口，以『源頭減人』的方式針對房屋問題的核心。」（節錄自《抗融合 拒赤化》廣告）。
記：廣告其實有提及自由行，你們卻執着在「源頭減人」這四個字去批評，你們是否在搞文字獄？
陳：我以「源頭減」喺WiseNews搜尋，得出嘅文章大多關於垃圾徵費，此概念正係由環保分子譚凱邦提出，好難叫人唔聯想到「源頭減廢」吧。譚凱邦以「負擔」、「承載力不夠」等環保概念講新移民，意味「人對環境有所污染」。若將人比作廢物，就應一視同仁，所有人都係環境負擔。譚話港人應增加，即意味港人唔係負擔，咁係inconsistent（不一致）。唔單止係字眼問題。
記：但每日150個單程證配額，的確增加人口，不就是令香港更擠逼，加重房屋壓力？
陳：香港被逼爆，並非每日150個單程證造成，試諗吓3,000萬自由行減至700萬，就會好多了。最大問題係，譚凱邦等人視新移民為負資產。八十年代中起去工業化後，香港廉價勞動力需求減少，新移民開始被視為負資產，會搶工作、搶福利。陳雲後來加上文化及政治問題，譚凱邦又加入新移民搶土地資源嘅論述，如壓在駱駝身上最後一根稻草，令新移民變成經濟、文化、政治嘅負資產。但事實係，新移民係都市勞動力，願意做較低薪嘅工作，為我哋舒適生活作貢獻。
再者，家庭團聚係人權，維護人權係香港核心價值。
雙非問題近年折騰港人，港媽生仔無床位、港B要跟自由行搶奶粉、報讀幼稚園也要瞓街撲學位。
記：每日150個的單程證配額是否可以分配得好點？要限制雙非嗎？
陳：我哋希望家庭團聚要快，否則會影響小朋友嘅教育。最好取消150個配額，實行浮動配額。無論係內地還是外籍配偶、家人，都應該用同一個標準。雙非比較麻煩，因《基本法》保障咗佢哋權利，我覺得正路應該修法。不過畢竟問題太複雜，例如內地有一孩政策，來港嘅係第二胎，容許雙非其實都係拯救生命。
記：你同意減少自由行、修法限雙非，其實也是在搞「源頭減人」！
陳：但我唔會用呢個字眼！源頭減廢係環保概念，絕不可將人當成廢物！其實港人好沮喪，鬧政府冇用，鬧共產黨又冇用，鬧地產霸權冇用，專才唔太敢鬧，投資移民好似有少少貢獻，發現最弱勢係新移民。
記：99年人大釋法剝奪部份港人所生內地子女居港權時，也有很多人同情，現在同情不如以往了，你認為是甚麼原因？
陳：我覺得同梁振英上台有關，一國兩制已經失敗，選舉時中聯辦指揮一切，港人幾乎絕望，反共、反赤化聲音好大；份聯署以反被融合做大標題，好多人只睇標題就簽咗，但我哋睇得比較仔細，發現點解唔係反自由行、投資移民，而要欺負港人嘅（內地）老婆仔女呢？
五區公投、政改方案也阻止不了社運人士的團結，但《抗融合》廣告爭議，卻令社運人士「分裂」，在網上掀起block人、unfriend潮及罵戰。
記：有觀點認為內地人，可能因成長背景而較接受中共，大量這樣的人來港會否影響港人意識形態？
陳：呢個係陳雲嘅「貢獻」，話佢哋喺文化上早被中共洗腦，用陳雲嘅金句就係「拖着中華帝國很長的身影」，我極之反對，亦好反感。如果我哋唔打開一個空間畀呢啲人呼吸，咁佢哋真係會畀蛇齋餅糭收買。泛民應該包容佢哋，我哋冇蛇齋餅糭，只有價值，可以用價值去融合佢哋。
記：近年有「左膠」一詞用以形容同情新移民、雙非的人，你承認自己是左膠嗎？應如何形容對家？
陳：我係一個左膠，一個好開心嘅左膠，我覺得左膠係保護香港嘅核心價值，批評嘅係制度，唔會針對個人。左膠其實係左翼，但常被與中共嘅「左」混為一談，最大嘅唔同係我哋係「人民左」，由下而上批評不公平嘅制度；共產黨係「國家左」，由上而下畀指示，反民主。對家就是右派，即係右膠！有名的右派都係反移民嘅，認為社會嘅問題唔係結構性、制度性嘅，係人嘅問題，係冇水準嘅移民拉低我哋嘅文化，喺澳洲、歐洲都好常見。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange