十月二十二日星期二行政會議開會之前，梁振英特登見記者，講咗20分鐘，主旨在反覆說明唔發免費電視牌照俾香港電視，全無政治考慮，無政治考慮，無政治考慮，無政治考慮（一共講咗四次）……咁考慮啲乜嘢呢？事先政府已講咗四種能力：（一）財政、（二）節目投資、（三）節目策略及製作能力、（四）建議服務的技術水平。政府認為香港電視整體評分不及奇妙電視（有線）及香港電視娛樂（電盈），於是三揀二之中，王維基輸咗。若果真係咁，王維基請咗幾百人，現在只係炒咗320個，少啲噃，應該全部炒晒先至啱，人地兩間乜人都未請，已經整體好過晒咯噃，王維基梗係請錯晒人啦！咁樣，蘇錦樑做乜對住記者「突然衝動，數十秒哽咽」，想喊咁款呀！一位中大校友打電話嚟講：「唔知邊啲人係上述四種能力嘅裁判、評判呢？會唔會係利華古遜嗰場波嘅球證？」校友真識講笑，但諗深一層，又笑唔出，點知有冇人出術，將龍門挖一個窿，等出咗界嘅波可以破窿而入龍門呀。王維基即日下午四時半開記者會，已反駁話在各項審核標準中，香港電視排名從未低於第二啦。
校友來電嘅真正目的，原來係想問左丁山會唔會去出席十一月廿二日晚上在文化中心舉行之「香港中文大學金禧校友音樂會」，由崇基管弦樂團、中大合唱團、新亞國樂團演出，還有沈祖堯校長參與演唱「獅子山下」，由中大冼為堅中國文化講座教授李歐梵為客席指揮。可惜吖，左丁山一時大意，約咗另外飯局，未必聽得到㖭。校友話：「咁就不如參加十月二十七日中大金禧校友運動日，睇陳德霖打排球！」哦，陳德霖在崇基社會系讀書時，係排球健將，呢次加入中大校友隊與中大校隊對抗，下午一時在中大體育館舉行，有睇頭喎！另外有籃球表演賽，NUTS明星隊（方力申、張繼聰等人）對中大校友聯隊。中大校友聯隊有多名香港代表隊及甲一隊球員出場，包括永倫主將黃鎮煒及長人趙勁皓等，場比賽應有睇頭。後來與一位昔日新亞籃球隊隊員講起，佢話近年有不少籃球好手入讀中大，大概物以類聚，不少好手都揀咗入新亞書院，故此新亞籃球隊實力大增，好過以前李明逵、張建雄、陸潤棠時代好多喎！