香港人數典忘祖，人民日報這樣說，大家不妨數吓，有幾忘祖。
一，忘記自己念番書出身靠英文拿A上位，家下開口流利煲冬瓜，梁凸發音，比薄熙來更標準。
二，香港勝在有ICAC，今日廉記淪為送牛腩魚蛋劈茅台專門「禮尚往來」的單位。遲下，由民建聯搭路，蛇齋餅糭升級，自由行成團入廉記參觀，要求專員陪吃曲奇餅交流交流。葛柏？係邊位？
三，今日湧返大陸買樓「安居」，子女讀完港大再到清華大學進修兼結識紅三代的家長，阿爺（即係你老竇個老竇，冇得三揀二！）是怎樣在文革被抄家批鬥，祖業被國有化的歷史，唔係通識題，唔使考，所以，忘記晒。
四，數典？講清楚，2003年的世紀病毒沙士，是國內的非典帶菌者X教授，首先帶到香港來的。非典十年，的的確確，全城已經一籃子忘記晒，辣招辣招辣招，取代洗手洗手洗手！