【隔牆對論】
記：《蘋果》記者
范：立法會議員范國威
廣告一出，協助新移民的泛民團體包括孔令瑜，狠批廣告無視家庭團聚，更指廣告歧視新移民，工黨張超雄和社運人士周澄更退出聯署。
記：廣告用源頭減人等字眼，是否歧視新移民、搞民粹？
范：歧視係有好明顯嘅法律準則，孔令瑜嘅指控係嚴重失實，因為我哋強調嘅係取回單程證審批權。
記：若撇開內地自由行與雙非父母和他們的小朋友，你對移居香港的內地新移民有何觀感？
范：我對新移民冇一個睇法，新移民來到香港，法律上係香港人，只係幾年後先攞到「三粒星」身份證，之後可以申請公屋、社會福利，但我認為政府應該有好嘅融合政策，協助新移民，畀佢哋快啲融入香港主流社會，去認識香港核心價值、主流文化，政府應該投入更多資源，等佢哋盡快適應。
我對新移民完全冇負面觀感。我曾經係留學生，喺美國加州讀書，讀完書後申請工作准可證，之後申請移民美國，攞過綠卡，之後亦放棄咗。我明白，要成為另一個國家嘅永久居民、公民，係好冗長過程，喺文化上嘅適應，要認識個國家嘅社會體制。
人口政策督導委員會主席林鄭月娥剛表示，不會為香港人口數目封頂，也不存在收回單程證審批權的問題。
記：新來港人士配額要減多少才足夠？
范：我哋喺呢個數字上未有共識，香港因為冇一個清晰嘅人口政策、藍圖，衍生一系列問題，無論係大量外圍人口、自由行、雙非孕婦來港產子，衍生有17萬至20萬雙非兒童，我哋一定要處理。我立場係，香港要攞番單程證審批權，堵塞漏洞，避免由國內部門審批單程證，避免內地有人以貪污舞弊、假結婚、假證件、洗黑錢、假借家庭團聚為名攞到單程證，令真係想來港家庭團聚嘅家庭要等好耐時間。
由其他地方嚟掌管自己地方嘅單程證審批，係違反國際慣例，因任何一個社會或國家，不能無止境地接受新移民，所以政府要有自己地方嘅人口政策，配合本土需要，有制訂移民政策嘅主動權，睇吓香港自身承受能力。
記：若150個單程證都是來作家庭團聚，是否就不用「源頭減人」？
范：政府發展新市鎮，例如洪水橋、新界東北，但每年5萬個新移民單程證配額，十年就有50萬人，邏輯推論，係咪要檢討呢個數量？單程證配額數字都試過檢討，例如由91、92年75個，94、95年變咗105個，再增加至𠵱家嘅150個。當香港居住環境、居住面積越嚟越少，人口增長率高過晒美國、韓國、中國，我哋先至推論，（單程證配額）係咪要減慢？
廣告中提到：「政府現時硬推新界東北新市鎮，希望容納17萬人口，但以每年約5萬新移民湧港，只足夠容納3年的新移民。」
記：新界東北不會全由新移民填滿，你們用新移民計這條數，是否誤導或抹黑？
范：絕對唔係。要搞清楚，我哋話要減少輸入人口，並不是針對新移民，移民有幾類，有來港讀書留低工作、優才、專才、投資移民來港，我唔認同話我哋只針對新移民。
任何一個地方要維持競爭力，增加人口得兩個方法，一係移民、一係鼓勵生育，前年政府人口政策報告書入面，隻字不鼓勵生育，只係講新增人口，我認為呢個係唔健康，有學者亦指，新移民政策都要兼顧本地市民需要，因為兩者整合有個速度。
記：廣告劈頭先談部份內地自由行破壞香港文明和秩序，令生活空間變得擠逼，之後談到回歸以來有逾70萬內地新移民來港定居，會否將「自由行、雙非、新移民」三者混為一談？
范：未來，我哋會講得更加清楚，減少呢啲誤會。（廣告有如此效果？）我覺得廣告係可以講得更加好，減少用容易引起誤會嘅字眼，下次會講得更加好。
記：假若你的妻子是內地人，源頭減人便是「減」你的妻子，你能否忍受？
范：我尊重家庭團聚呢個大原則，香港要攞番單程證審批權，減少走後門嘅情況，反而會幫到家庭團聚新移民，完善移民制度。我相信新移民喺政府協助下，應該盡快學習、融入大家庭，希望佢哋生活得合心意，學習當地文化、核心價值。
mailto:[email protected]
鄭中基＠谷德昭搞笑孖寶再發功，笑彈繼續嚟！
周一至周五《亂噏24》約定你： http://bit.ly/appletalk24