二○一三年剩下兩個月，今年樂壇還沒產生突出的新人，倒有一些鹹魚因為歌唱選秀節目而翻生。香港人熟悉的一個叫鄭俊弘；另一個，鍾偉強（Simon），也是香港人，36年前參加過比賽贏過張國榮，以60高齡出戰內地節目《中國好聲音》，唱Rock，輸了比賽，贏了幾億觀眾的心。
撰文：劉連
攝影：潘志恆
場地提供：Tonno Club
可能個天想我唱
Simon很紅很忙，8月底《中國好聲音》播出以後，他平均兩三天飛一次出騷，「內蒙、敦煌、甘肅都有，咁遠我唔接喇，真係攰。」電影、廣告片約送上門，未來兩個月都有大型演唱會，現在一天只能睡兩小時。
「聽講以往的選手，最多去幾個大城市登台，我就東南西北都有人請，內地人鍾意我夠正能量──我年紀大、唔靚仔、唱英文歌、普通話差、返大陸冇後台、唔識人，紅嘅機會應該係零，但咁都跑出，係奇蹟。」60歲才第一次走紅，比起初嘗紅滋味的年輕人，Simon很淡定、心水清，沒有那種患得患失的神情。
類似的一夕爆紅經驗，他試過：77年他參加《第二屆亞洲業餘歌唱大賽》得到冠軍，之後跟當時的亞軍張國榮雙雙加入麗的電視；他想唱歌，公司安排拍劇，4年後引退，沒有光榮，「娛樂圈唔啱我，我份人，最唔鍾意等。拍劇，全世界朝早8點入廠，等到5點先拍到你，中間幾個鐘做咩？呢種編制，我覺得好唔尊重人。性格上，我又唔鍾意埋堆，想個導演用你，有時要搞好多小動作。我好藝術家脾氣，唔鍾意，就唔做囉。」
這句再見夠徹底，一隻腳踏出電視台，翌年他就轉行賣保險，天天着西裝打呔，往事一概不提，連親生女兒都不知自己老竇唱贏過張國榮，「人家紅，我冇所謂。人家有努力付出，名成利就，是值得的，我冇付出，冇收穫，好公平。再說，我在娛樂圈發展得麻麻哋，提嚟做咩？提開，人哋又問你有冇眼紅乜乜物物，做乜自己舂入個坑俾人問？」
跟音樂圈，維持淺度聯繫：偶爾寫歌給人唱，最紅的一首是《朦朧夜雨裏》；90年代初飛圖出卡拉OK大碟，一半英文歌由他負責翻唱。諸如此類，當過心癮，不奢想揸咪重上舞台。
直至03年，他心臟病發，入醫院做搭橋手術，面對死亡邊緣，他問自己，有乜嘢想做未做，「我同個天講，如果俾我好番，我想唱番歌。我有天份，後生時未用晒，我想再次將天份攞出嚟。」
卒之大難不死，他冇藉口不兌現承諾，「可能個天真係想我唱。」
Rock友難過女兒關
年過半百，重新出發，比想像中順利。07年，Simon組團上廣州酒吧找機會，唱回自己最拿手的歐美Rock Song，馬上有一批捧場客，參加《好聲音》之前，他的身價在廣州已是數一數二，「內地人玩Band比香港盛行得多，年輕人對搖滾樂有渴求，偏偏沒有這類歌手，所以我有市場。」試過有俄羅斯富商坐私人飛機專程捧他場。
他唱得過癮，觀眾比他更High，熱心到打電話去電視台，叫攝製隊採訪這名音樂老頑童。啱啱遇着剛剛，遼寧衛視買了英國選秀節目《The X Factor》的版權製作《激情唱響》，四圍打鑼找個會唱Rock的中國人，廣州電視台提供了Simon的名字。他想想自己未去過北京，就去玩玩，拿到第五名。不久《中國好聲音》又來找，他原本推掉，女兒再三鼓勵，他於是又下海，「當最後一次參加比賽，留個紀念，也讓女兒知道，做人要堅持夢想。」
內地選秀節目製作龐大，錄一集要個多星期，百五名選手全員到齊等拍攝，一支公參賽的Simon，自言等到人都癲，「電視台包機票住宿，個個選手都有家人陪，我冇。連續九日一個人食飯、等拍攝、現場打晒燈又熱，真係好悶。」換轉30年前，他應該執包袱走了；想起答應了個女，他忍。好不容易等到上台錄影，他唱Adele的《Rolling in the Deep》，音樂起，他突然情緒翻滾，「之前一晚跟個女通電話，我說我會唱《Rolling in the Deep》，她哼了兩句，臨收線前，講了句Daddy I Love You，上台時思緒一來就失控了，唱幾十年都未試過。」Rock友難過女兒關，他怎都唱不下去，淚眼滾滾衝下台，心想此行完蛋。隔幾天導演叫他回去重錄──選秀節目上是破天荒──「導演問我介不介意，事情一旦揚開，一定會有閒言閒語，我諗，我60歲人，咩世面未見過，頂得住，於是回去重錄，我想完成呢件事。」重唱一刻，依然緊張到手震震，但四十年功力紮實，澎湃歌聲博得三位導師轉身（註：《中國好聲音》採「認聲唔認人」制，四名導師的座椅原先背對選手，聽過歌聲後覺得有興趣才會轉身），內地觀眾開始記得這名搖滾老頑童。
佢哋駕馭唔到我
最終還是輸了，在被淘汰的一集，他跟黑龍江少女畢夏對唱《Hey Jude》，氣氛高漲。畢夏英文不佳，他耐心逐個字教唱，結果導師卻宣佈Simon出局，戲劇性十足，該視頻全國點擊率逾三億。那場比賽，大家都哭了，觀眾哭Simon輸得唔抵，畢夏哭自己贏得莫名其妙，Simon看得最開，「冇辦法，節目有節目嘅需要。節目到後面幾集，導師要教選手唱歌，我輩份高佢哋咁多，點駕馭到我？一早預咗好快被淘汰。」以他「怕等」性格，出局到底不是壞事。「我參賽係為個女，𠵱家已經有交代。」
內地選秀節目，愛講故事，他的角色，被塑造成一個孤獨的單親爸爸，跟女兒關係疏離，觀眾看了流下傷心淚，上網留言勸Simon女兒早日原諒爸爸。「冇，我同個女關係不知幾好，係少見面，但成日有通電話。至於話個女唔嚟睇比賽，佢都要搵食，錄咁長時間，點嚟？」但也多謝電視台好心撥扇，剛過去的中秋，女兒終於現身Simon演唱節目，父女合唱了一曲《Rolling in the Deep》。
60歲才走紅，他野心不小，「唱歌始終有虛榮心，想多啲人聽到，得到更多掌聲。12月我會開個人演唱會，未來最想出一隻原創大碟。」60歲才成名有好處，把世事都看透了，沒有無無謂謂的顧慮，心境最純粹自然，「大病過，我知道人生很短，當我能活到七十幾，仲有十幾年，就盡情做我想做的事吧。人生幾何有咁嘅機會，成60歲先第一次紅？既然上天安排咁嘅機會，就盡力做。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange