日本賓架H在馬會午飯時，問及香港時事，一時難以一一解釋清楚，特別係佢問到星期五（十月十八日）下午抵達酒店之後，睇吓本地西報，有免費電視牌照一事，究竟係乜東東？點講呀？不知從何說起。只能夠講：「獲得發牌嘅兩個財團，係本地大家族擁有，一直與特區政府維持良好關係。」賓架H點頭話：「呢樣好重要㗎，與政府維持良好關係先至有大生意做，全世界都一樣。」日本人對呢樣嘢，當然係專家，三十年前通產省（現經濟部）權傾一時，日本有邊間企業敢得罪通產省呀？見到就要鞠躬㗎啦。
王維基在中大讀書時，已經唔識向馬臨校長鞠躬嘅啦，出到社會做事，創業，白手興家，挑戰大財團，強搶市場份額，更加對鞠躬一事不知如何處理，今日得唔到免費電視牌照，俾梁振英主導嘅特區政府玩殘，死因大概係唔識鞠躬之故。全世界消息人士都知道2009年十二月，係劉吳惠蘭打電話俾佢，叫佢申請免費電視牌照嘅，佢就天真咯，以為「相公厚我」，點知一朝天子一朝臣，新權貴翻面不認呢。
星期日有十二萬人上街撐香港電視（警方話有三萬六千人，加埋除二都有近八萬人，人數多到得人驚），誠始料所不及，一來無政黨組織，二來無長時間醞釀，只講fb羣組號召，竟有如此大數目示威人士，可見正係民意沸騰，羣情洶湧，示威訴求不單止是為了有電視劇集睇，而係覺得梁振英政府實在太離譜，可發三個免費電視牌而不發，偏要發兩個，而得牌照者，就係兩個並不熱心投資於免費電視，毫無創作熱情嘅集團，內裏原因不須解釋，表面理由就係唔想對市場有衝擊，簡直當全香港市民係儍嘅。「爽報」執咗笠，政府何曾會表達關注呀？又唔見政府維持免費報紙市場秩序？最不堪者，政府借行政會議保密為理由，拒絕說明，但同時又透過不同消息人士（商務局？中央政策組？行政會議成員？）向至少三份報紙散風發放不同訊息，皆以抹黑王維基財政能力及電視工作經驗為目標。堂堂政府，不敢公開聲明，卻躲在幕後放箭，手法可稱卑劣。鄧惠鈞好彩已經唔做新聞統籌專員啫，否則會代人孭鑊，不知如何面對昔日傳媒朋友。