【亂噏24 第16集】鄭中基（Ronald）憑《低俗喜劇》勇奪金像獎最佳男配角，喜劇天份盡現，但假若當初沒有發生醉鬧客機事件，其演藝生涯或早已完結。Ronald今次上《亂噏24》，被蔡瀾和黎智英（肥佬黎）夾擊下，講述當日在三萬呎高空喪隊威士忌、大唱大叫、再「制服」空姐的瘋狂事迹。《亂噏24》足本版逢周四晚上11時播出，讀者可在 http://bit.ly/appletalk24重溫。
撰文：馮國康、Sidekick
鄭中基和谷德昭這對喜劇孖寶，日前作客黎智英大宅亂噏一餐，兩人正在替黃百鳴拍賀歲片，今次更找來黃百鳴「死對頭」曾志偉演出。原來肥谷與Ronald不知不覺合作了七部電影，肥佬黎問他當中有幾多部要虧本？肥谷自信地答：「我諗有百分之八十以上係賺錢。」他解釋每年只拍一部戲，很多商業考慮都計算得很清楚，絕不會讓投資老闆難堪：「如果蔡san係監製，佢眼中我係屬於睇餸食飯嗰啲導演！」蔡瀾笑說肥谷深知自己定位，都不是拿獎的料子，肥谷自有苦衷的答：「你次次拍瓜咗，就冇人投資拍戲。」說到底都是責任兩個字，是向投資者負責。當然有很多導演都不顧慮投資者感受而我行我素，肥佬黎笑說：「唔負責任嗰啲叫artist囉！媾女都唔使負責㗎！」
肥佬黎怕老婆
說到藝術家，Ronald認為凡事只要在前面加上「the art of」便成為藝術：「The art of呃人、the art of燜冬菇，都係藝術。」的而且確，我們的梁特首也以語言偽術聞名於世。肥佬黎認識一位姓施（拒開名）的出版界名人，媾女媾到不得了，問他不用負責，竟意外得到對方回答：「我哋藝術家使乜負責㗎！」令肥佬黎有股做藝術家的衝動。蔡瀾大爆另一位藝術家的癖好，「真係乜女仔都鍾意」，便是有「禽獸導演」之稱的牟敦芾，其執導的《打蛇》和《黑太陽731》為剝削電影的經典。他本身也甚有藝術家風範，留滿臉鬍子，一副不修邊幅模樣，偏偏有女人喜歡這類型浪子，覺得可以收服到他。
蔡瀾認為女人愛支配男人，是母性社會遺傳下來的結果，就算強如肥佬黎，在女人面前也得卑躬屈膝，他笑說：「我都投降呀，我老婆都控制到我。太平天國最緊要呀！越早投降越聰明。」Ronald問到古時男人三妻四妾，情況豈不更糟？倪匡答得妙：「中國男人夠聰明，三妻四妾，由你哋去鬥，費事搞到我！」肥佬黎生於大家庭，對上有四個母親，他親身體會到父親之苦，他說：「老實講，老婆你愛佢三分之一就夠啦，一個已經夠煩啦，仲要整幾個？煩死呀！」
被扣手銬腳鐐
Ronald剛從馬來西亞登台回來，肥佬黎先入為主以為他搞棟篤笑，幾乎忘記對方是唱歌出身。Ronald苦笑說：「嗰陣時咪以為自己唱歌好懶叻，點知就衰晒。」身邊的蔡瀾不停游說Ronald，要他分享當年在飛機上的糗事，Ronald便娓娓道來。話說當日下午他跟大學同學聚會，其時已狂隊啤酒，半夜上機後再飲威士忌：「跟住一起身就有兩個FBI企喺度！」他記得在醫院時已被拘留，繫着手銬、腰鏈和腳鐐，跟一班不同種族的犯人等候過堂，要慢慢一步步向前走，當時還下着大雪，情景悽慘。「我個頭仲俾人扑，包到好似阿差咁樣，入到去（監倉）就俾人笑，因為原來監入面啲人好清楚新入嚟做咩，呢個咪喺飛機俾人扑嗰個儍仔囉！」
Ronald其後透過空姐、機長、副機長的證供，才組織到當日斷片時所發生的實際情況。「我好大聲咁唱歌啦騷擾到人，跟住就入咗廁所，好耐都唔出嚟，點知原來屙屙吓尿瞓咗，條褲都未『休』好，跟住敲咗好耐門，又聽到我喺度唱歌，咁先開門入嚟，要我坐番埋位。」Ronald回到座位後又追酒飲，之後他同時間「制服」了兩個空姐及一個副機長，最後機長用電筒一棍扑向他的頭，事件才告平息。他續說：「要緊急降落去Anchorage機場，因為飛咗唔係好耐，要放晒所有啲油。」倪匡笑說：「嘩要賠好多錢喎！」Ronald答：「嗰次係我出道兩年，嗰啲錢冇晒，賠晒。之後返到台灣再俾人告多次。」他慶幸事件發生在911恐怖襲擊之前，要不然肯定麻煩得多。Ronald認為這次沉重教訓，是上天給他的當頭棒喝，若不是有這樣遭遇，他也不會醒覺，演藝事業也可能玩完了。
倪匡揪阿梅髮
倪匡素有「醉街作家」之稱，自然有不少醉酒「紀錄」，他說：「第二日朝早醒咗，一路頭痛，一路打電話問人，噚晚闖咗乜嘢禍呀？有次真係離譜，佢哋話我揪住梅艷芳啲頭髮通場飛！」蔡瀾更大爆倪大俠瘀事：「三毛呢，嗰個寫作家，人唔靚但對手好白，佢拎住咬！」倪匡說：「呢啲唔關我事，古龍挑撥我先！」肥佬黎問倪匡這一生闖過最大的禍是甚麼？倪匡稱沒有，蔡瀾忍不住開口道：「共產黨嗰陣時撞咗，走番落嚟囉，俾人捉去槍斃仲唔係大板？」倪匡又醒起一次瘋狂事迹，是他單人匹馬在尖沙嘴追着四、五個蠱惑仔來打：「佢哋一路走一路話，倪匡你以為你真係衛斯理呀？我就哈哈大笑，算數啦，再飲過，我請我請！」蔡瀾即踢爆倪匡試過飲醉酒，嘔在的士上，要付千元鈔票給司機大佬。
暴龍哥爆粗好爽 阿女聽到跟住講
http://bit.ly/talk241601
拍笑片睇餸食飯 最緊要老細穩賺
http://bit.ly/talk241602
妙齡女入局 騙徒自稱藝術家
http://bit.ly/talk241603
肥佬黎求天下太平 向老婆投降最聰明
http://bit.ly/talk241604
港男單身有原因 鍾意滾唔想結婚？
http://bit.ly/talk241605
穿州過省見倪匡 一睹珍藏AV風光
http://bit.ly/talk241606
航機供酒無規管 醉酒鬧事難控制
http://bit.ly/talk241607
醉酒穿頭賠身家 Ronald唔再做無賴
http://bit.ly/talk241608
大鬧尖咀 憤怒阿伯單挑古惑仔
http://bit.ly/talk241609
醉街作家high high哋 扯梅姐頭髮滿場飛
http://bit.ly/talk241610
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24