公牛、熱火周三都有季前賽，兩邊長唞傷兵復出後都有好表現。熱火對塘鵝有奧丹4年嚟首次再踏賽場，場面勁感人；公牛控衞戴歷路斯對西岸勁旅雷霆都冇手軟，攻入26分領軍以104:95贏波！
熱火有久休嘅球員復出，就係07年狀元奧丹！熱火主帥史普利斯查一直都冇話過會畀佢上陣，但周三作客對塘鵝，第2節突然派佢出場；雖然只上陣4分鐘，但奧丹一落場就喺籃底表演雙手大力入樽，最後錄得兩分、兩個籃板。一班熱火兵見到佢入樽，都即時企起身大聲呼歡。最後熱火憑勒邦占士攻入27分，以108:95大勝。史帥賽後話，仍然會慢慢觀察奧丹復原嘅狀況，今場派佢上陣係對佢努力練習嘅獎勵。
路斯同日繼續勇不可擋，鏟籃入楔完全冇問題，第4節最後4分鐘仲射入3個3分波，助球隊以9分之差，力挫有杜蘭特攻入22分嘅雷霆。杜蘭特今個夏天同路斯一齊練波，賽後都大讚老友：「好球員會努力求進，路斯就係咁嘅人。今個夏天同佢一齊操練，睇到佢對完美嘅追求。」
另外，聯盟班主同日開會投票，一致通過將總決賽賽制改回2-2-1-1-1（現為2-3-2），令到賽事更公平，今季即時生效。
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24