剛脫離無綫嘅藝人羅敏莊，同前港視藝員羅貫峰，隨着更多免費電視牌照生效，不愁去向，近日自由身加盟有線，同主播劉明軒一齊主持飲食節目《色香味主播室》，噚日有線仲請咗吳綺莉、周汶錡到尖沙嘴宣傳。
謀出兩份糧
成龍近日一番災難論惹起城中人驚訝，連同佢生咗個女嘅吳綺莉都摸不着頭腦話：「唔識回應，問題有啲難答，咁深嘅點解？天災人禍個個都唔希望，開心亦希望個個有。」講到成龍經常講多錯多，係咪要收口呢？吳綺莉話：「唔敢評論人哋，咁人哋唔講畀我哋講埋囉。」
吳綺莉話計劃日頭做主持工作，晚上想做電台主持，咁搏唔通真係傳聞所講經濟有困難？佢笑笑口話：「我貪錢，出多份糧梗係好，想搵多啲錢好正常箒，邊個唔想出兩份糧，返咗嚟兩年幾，未來都要計劃工作。」
記者會上大家都勁抽無綫水，不斷重提May姐馮美基喺無綫節目《May姐有請》招牌笑聲「哈哈哈哈」同雞汁，充滿挑釁性。羅敏莊上月約滿離開無綫緊接到有線開工，佢話毋須過冷河，怕唔怕日後返唔到無綫？羅敏莊都係嗰句：「咁我都要搵食㗎。」正正道出打工仔心聲。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！