卡斯拿斯應唔應打正選，呢個問題交番畀安察洛堤處理，但小弟認為，卡斯拿斯唔應該有種自以為係必然正選嘅心態。既然皇馬已經簽咗迪亞高洛迪古斯，佢就要服從球會，尊重輪換制度。
要講番少少歷史先，前皇馬教練摩連奴係個強勢主帥，唔容許球員嘅權威超越教練，而有報道指，卡斯拿斯結黨營私，挑戰摩帥，仲通過佢個主播女友，將皇馬更衣室內嘅消息爆出去，等摩連奴內外交困。淨係憑呢啲行為，教練已經可以賣走佢，所以摩帥只係打佢入冷宮，搵迪亞高洛迪古斯打正選，都已經落手輕。
今季摩帥離隊，卡斯拿斯如願以償，但新上任嘅安察洛堤亦冇就範。喺肥安眼中，穩定係最重要，如果佢將迪亞高洛迪古斯貶做後備，捧番卡斯拿斯上去，呢個做法好有風險，因為迪亞高洛迪古斯暫時冇大犯錯。因此，肥安𠵱家玩門將輪換，一個踢聯賽，一個踢歐聯，其實好公平，同埋兼顧到各方利益，做法面面俱圓，非常之有肥安特色。
講出身，迪亞高洛迪古斯都喺皇馬出道，由C隊到B隊咁慢慢打上去，之後喺一隊撈唔掂先離隊，最後由摩帥簽番返嚟，所以都算根正苗紅。筆者認為卡斯拿斯要學懂收斂，行低調路線，默默耕耘，就堂堂正正同迪亞高洛迪古斯比高低。一個好教練，絕對唔會因為球員扭計想踢某個位置就畀佢踢，更唔會容許某啲明星級球員將自己嘅地位放喺球隊上。肥安唔係莫耶斯。文：咖喱
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24