金管局前總裁任志剛正式同建設銀行（939）講拜拜。建行噚日公佈，任總本周三起唔做獨董。雖然建行失去呢位金融界重量級獨董，但就預告尚有4名獨董候選人等緊監管機構核准，依然人強馬壯咁話喎。
據聞，任總2009年自金管局退休，翌年做建行獨董，主要因為佢跟時任建行董事長郭樹清相當老友，老友提出邀請，自然盛情難卻。郭樹清過去幾年都已由中國證監會，再調任山東省省長，所以完成三年任期後，任總唔連任建行獨董都好合理。
建行多謝任總喺公司治理、戰略發展同風險管理方面作出貢獻，任總又承諾將嚴守該行商業秘密，即係離開之後唔會多嘴。建行董事會將會由13名董事組成，包括4名獨董，仲有4名獨董候選人等緊監管機構核准，其中一位應該係恒生（011）前一姐梁高美懿。
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24