本欄18號推介海王（070），到噚日五個交易日，最高升咗80%，今日整多隻平靚正嘅濠賭股中國星（326），博做海王翻版。
中國星嘅主打業務，係喺澳門經營蘭桂坊酒店及蘭桂坊娛樂場博彩服務。今年上半年度，集團純利颷升咗22倍到6,174萬銀。又唔計期內一項非經營性嘅無形資產減值4,100萬銀，中國星實際大賺1億銀，靚仔到爆。
同海王一樣肥仔水
好似上次品題嘅海王所講，澳門博彩收入，下半年以嚟，平均每月大增20%，海王肥仔，中國星亦一樣肥仔水。係咁意計數，中國星今年全年實際純利起個孖到2億銀，就算連埋永恒策略（764）兌換中國星CB攤薄效應，EPS約莫4仙，現價（7.9仙）預期PE得1.9倍！
同樣，連永恒兌換集團CB攤薄因素，中國星嘅資產淨值係0.28元，現價大幅折讓71%。上邊海王，經呢轉狂升，PB收窄到貼近1倍。賭業股當中，中國星又係平到爆。
又呢次永恒CB兌換中國星股份，再將股份配發畀街外人，每股成本講緊0.135元，中國星現價折讓咗40%，仲抵買。
中國星啱啱呢個星期三，發公告話正就出售蘭桂坊酒店，同獨立第三方展開初步磋商。咁睇，中國星喺酒店及博彩業投放嘅資源，資產值高達16億銀。呢兩年澳門博彩旅業好景，若果呢壇大製作真係成事嘅話，出售價格，極有機會高好多。
又就算以呢個價計，連埋南北行出售及手頭揸住嘅，中國星淨現金將高達18億銀，係家陣市值嘅3.5倍！跟住要諗嘅就係，中國星揸咁多現金，做乜？點都好，呢轉博中國星PB追貼海王，見0.8倍，都要升1.9倍，到0.23元。
錢雋
細價股專家
本欄逢周二、五刊出
鄭中基@谷德昭搞笑孖寶再發功,笑彈繼續嚟！
周一至周五《亂噏24》約定你： http://bit.ly/appletalk24