銅鑼灣有間賣bra樓上舖，無門面無裝修，但客多到要派籌，仲寸到每日限派100籌。女生們苦等幾粒鐘，都堅持要喺呢間買，因為舖內有「世外高人」，人稱「胸部教主」嘅銅鑼灣蔡太，經佢法眼一睇，就知你應該着乜bra先靚，長遠可塑身，三個月「覆診」一次，包你挺起胸膛做人。
舖仔細細，但客路極廣，由少女、準新娘、中女都見，證明女人對「事業」嘅追求無分年齡。查實今日嘅內衣市場，已比7、8年前大好多。菲菲中學時，同學仔們炎炎夏日都堅持着件冷衫，你估真係唔怕生熱痱咩？慘在那個年代，身材過於玲瓏浮突彷彿是罪，邊有人會追求功能內衣？
不過多得以周秀娜為首之𡃁模大軍，提醒少女們做人要有「事業心」，成功令新一代少女也不再怕醜，內衣亦唔會hea買，有得托就托，總之要令人知自己「事業」有幾掂。
女人對內衣越來越有要求，對內衣公司來講，當然係一個黃金機會，只要識sell有gimmick嘅內衣，自然可創造市場。內衣股中，安莉芳（1388）比較似樣，第三季銷售增17%，股價噚日逆市升。公司近年積極搞網上銷售，食正後生女條水，上半年網上生意按年增1.5倍，前景看好，有閒錢可逢低吸。
Fifi
本欄逢周二、四刊出
足本收睇《亂噏24》x陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24