日本大賓架Ｈ來港一行，搵到日本通Ｃ大哥，再叫埋左丁山到馬會一聚，於是星期六中午到幸運閣吃午飯。賓架Ｈ以前駐香港時，大家有來往，都幾好傾嘅，佢係慶應畢業生，Ｃ大哥係留學早稻田，日本最著名兩間私立大學，早慶相稱，一年一度之早慶棒球賽，係大學體育盛事，在日本商界，早慶人係零舍着數嘅。為咗左丁山，大家講英文，賓架Ｈ現於東京總行做COO之位（專務取締役），位高權重，但要全世界飛來飛去，與我地吃過馬會靚嘢之後，當晚午夜就要飛去約翰尼斯堡，日本人升到公司咁高職位，年紀已經不小，經常長途旅行，咪話唔辛苦。賓架Ｈ話飛往非洲都冇飛往巴西咁辛苦，從東京往法蘭克福要十二小時，等候轉機要五小時，上機後又飛十餘小時，真係人都癲，何況到埗，開會，出席儀式，會議之後，就會照原路返東京，里約熱內盧市內有何好玩地方都唔知。Ｃ大哥笑曰：「如果知嘅話，即係有時間去玩？容乜易變咗係湯顯明到雲南開會順便遊麗江？死得㗎！」
賓架Ｈ不明所以，要左丁山解釋何謂湯顯明遊麗江，當作笑話一宗。問佢點解唔從東京飛去或LA轉機飛巴西，而要繞道歐洲？佢話好怕美國移民官員嗰副樣貌，檢查又麻煩，經常阻頭阻勢，阻延佢接駁飛機，若非到美國公幹，佢盡量想避開美國機場。
美國機場移民官大概係先進國家之最乞人憎嘅機場人物，美國一位著名作家就曾在IHT（現改稱INYT，即國際紐約時報）撰文，講How not to welcome tourists，主角人物就係機場移民官，呢班人大多數板起塊面，當外來遊客係壞人，最好唔好入嚟美國咁嘅款。一位香港富豪曾經在農曆年去拉斯維加斯，入境時在三藩市機場報上所帶現金，因忘記了行李箱內還有一大包新年利是，被搜到出來，大件事咯，被當「賊辦」，審犯咁審侮辱一小時有多才放行。兩個月後，佢再到三藩市公幹，移民官一見到佢本護照就叫佢行埋一邊企響度，不理不睬，佢企足一小時後，先至有人向佢問話，放行，佢知自己已被列入「黑名單」，一氣之下，放假只往歐洲消費，美國有公事就派夥計去。香港不少有錢人「反美」，皆因美國移民官而起。