陳敏之同黃智賢（Ben）近日趕拍無綫新劇《點金勝手》，劇中佢哋係女尊男卑嘅情侶，雖然係咁，不過佢哋都好sweet！劇情交代飾演商業罪案調查科督察嘅敏之因為家事而煩惱，顯得悶悶不樂，Ben就諗計仔開解女友，於是帶佢去公園嬉水作樂，兩個大唔透，最後玩到濕晒。
敏之同Ben日前隨攝製隊去咗金鐘香港公園拍外景，近日已入秋，晚間開始轉涼，佢哋要拍一場玩水濕身戲，真係好容易冷親感冒。着咗恤衫西裝嘅Ben為咗入戲啲，佢預先用大樽礦泉水照頭自淋，全身濕透配合劇情需要。之後佢再拉住敏之衝到水柱下玩水，令女友破涕為笑，佢哋好有默契，當然順利完成。
關心港視裁員
為咗拍好呢場戲，敏之話佢早有準備：「我着咗好多件衫打底，咁樣冇咁易冷病。」佢話套劇好少槍戰，最多係飛吓車，主要係感情戲為主。另一方面，Ben開工都不忘關心香港電視被裁嘅員工，佢話：「我都好留意呢單新聞，當中好多係我舊同事，最想人人都有工做，始終年尾流流，失業真係好慘㗎！」
版主：陳基征
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24