每個人心中都有一把尺來衡量何謂「公平」，例如《少林足球》的師兄弟便會認為「點解我咁靚仔但就無頭髮，你地咁醜樣就大把頭髮」來表示「不公」，好明顯他追求的「公平」就是「長相與頭髮成正比」。
夜蒲人士的「公平」，或許便是，「有錢唔係大晒」。有錢有女無錢收隊，但你睇吓個有錢仔成個豬頭炳咁，條女就咁索，真係唔公平！
有車一族的「公平」，應該便是「貴車唔係大Ｌ晒」。之前香港有一宗「車聚變犯罪」的新聞，話說警察在旺角拖走幾架改裝汽車，懷疑將進行非法賽車云云。
網友起底，被拖走的戰車都是日本貨，結果網絡群情洶湧：「做乜淨係捉日本車？車聚都未賽車就被人話可能犯法拖走，好唔抵！」另一網友附和：「如果係歐洲名車例如法拉啦堅尼嗰Ｄ，警察肯定抄牌都手震，一定放生！」
結論當然是「不公平」，警察歧視日本車，膜拜歐洲車；車友心目中的「公平」，肯定是「拉利犯法與錢七同罪」。
車友早就認定，有錢人的車有特權有力場，不受抄牌風雲變影響，每架超跑名車都是特權象徵。
網民常說，警察抄架林寶都要call返台請示，但抄日本MK車卻手起刀落，係咪貧富有別？
你應該明白為何傳媒最愛刊登「某某皇室成員/當紅巨星，座駕違例泊車，司機響朵求情，交警鐵面無私落簿照抄！」的新聞，因為這是非常難得一見的場面，名車犯法與錢七同罪，這就是車友心中的「公平」。
打工仔的「公平」很簡單，歌仔有得唱「出咗半斤力，想話攞番足八兩」，付出與回報應該正比。Sorry，老板總是付出蔗渣價錢，卻要你有燒鵝味道囉。