如果思捷（330）啲衫，有佢換高層換得咁密嘅話，咁就真係發達喇！噚日思捷公佈設計部一姐Melody走人，是新CEO馬浩思（Jose）上任一年以來，最高級的管理人員變動。要搞改革，第一件事通常就係換血，再加上思捷以往的架構，以龐大兼累贅聞名於業界，裁員似乎是走唔甩的。
據講今年中，已經有兩名創作部高層走人，上月再有三名最高達VP級的管理層起身，主要是負責零售分店擴張的人員。家陣思捷要refocus在產品及縮短流程上面，開舖嘅嘢擺埋一邊，所以有咁嘅變動，唔難理解，亦唔排除會陸續有來。
Jose將管理架構推倒重來，連他自己在內的九人領導小組中，基本上只有三名屬前朝職員，當中不少已被調職。例如批發的阿頭現時轉咗去睇歐洲（德國除外）市場，採購阿頭就變咗睇亞洲。Jose仲成立咗一專門小隊，負責推動改革，四名成員的共通點是今年才到任、並且全部都係喺Zara工作過。
思捷的改革，要面對多項極度艱難的挑戰，首先要突破的就是內耗。以前舊CEO就畀budget你去使錢做marketing，如今Jose就要慳家、要減人，仲要迫你由頭改過以往做嘢嘅方法。你估有無反彈？據說這大半年，Jose都是在做「準備功夫」，真正落刀為Esprit做手術，𠵱家才開波。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange