明日是陳百強逝世20周年的日子，才華橫溢的他於35歲已撒手人寰，生前曾跟他並肩作戰的夥伴、好友和歌迷至今念念不忘，眼淚在心裏流！
陳家瑛（經理人）：
佢太敏感，如果佢活喺世上咁唔開心，可能輪迴快樂得多！佢後期作曲上有難度，靈感冇以前咁快，最後隻碟生產過程幾難，加上佢臨走前四大天王起緊，覺得有壓力。當年用盡辦法開解佢，可惜結局事與願違，其實佢好識為人着想，朋友有難會幫，好錫媽咪又用心工作，不過佢處女座要求完美，記得有次佢撞車四腳朝天，個個擔心佢有事，但佢爬出車後，第一件事係睇吓衫有冇爛。第一次同佢合作做騷，嗰時紅館起好冇耐，搭台打風漏水，地下水浸觀眾席濕晒，點知佢好鎮定，好溫文爾雅處理問題。反而遇到唔喜歡做嘅事，Danny會發脾氣，佢唔鍾意會提高聲浪，藝術家脾氣，逼佢交歌宣傳都唔鍾意，我成日俾佢激親，問佢可唔可以做多啲？佢會話有冇搞錯。
袁潔瑩（老蘭蒲友）：
未入行已經係佢fans，鍾意佢啲歌同外形，覺得佢好有才華，官仔骨骨好有修養好有書卷味。嗰時得13歲未拍拖，Danny係我幻想戀愛對象。入行後記者知道我鍾意佢，拉我同佢合照，我震到貓王咁，嗰時我成日去DD望吓佢，佢好享受一個人對住塊鏡跳舞。
因為以前男友（徐日勤）同Danny熟，19歲生日佢哋畀驚喜我，Danny出現同我慶祝，之後我哋做咗朋友，佢有教我做人道理，佢把聲好斯文，叫我阿瑩，感覺仲似阿哥。好記得有晚喺DD，我哋都着咗白飯魚波鞋，一齊舉高腳，佢全身可能貴得好緊要，但就有對十蚊嘅白飯魚。如果揀首歌代表佢，《我的故事》最適合，佢永遠活喺自己情緒裏面，如果佢活到𠵱家，佢接唔接受到𠵱家歲數？接唔接受到冇以前咁型？我會擔心佢囉！
肥媽（好友）：
以前成日同Danny仔去DD跳舞聽歌，有次我上佢半山屋企，見到佢喺鋼琴前面掛晒啲獎項，仲要每個獎都有盞燈照住，我記得自己話過佢：「你唔好一盞燈照一個獎，我啲獎就收埋晒嘅，甩頭甩骨都唔理，因為我驚，知道花無百日紅，你每朝起身彈琴就睇住啲獎，如果有一日，你有啲咁多down嘅時候，會唔會心翳呢！」當時佢答我：「好辛苦攞返嚟㗎！」可惜佢始終過唔到嗰關，其實佢成日游水好健康㗎，佢太有才華太完美，又靚仔又有錢，真係嘥咗佢！
蘇永康（忠實粉絲）：
入行後知道佢成日唔開心，一個人去disco跳舞飲酒，最記得林慕德因回教徒身份，結婚冇酒飲，嗰晚我同Danny一圍，佢發現冇酒飲就落便利店買氈酒叫我陪佢飲，我飲一啖塊面通紅老尷到痹，佢仲一直劈緊，隔兩日喺餐廳撞到佢，我行埋去打招呼，佢好似唔識我咁冇反應。第二次喺廣東道disco，我坐到打烊離開，見到佢又飲到醉晒，求DJ播多首歌畀佢跳舞，我用毛巾幫佢抺面，佢問我毛巾乾唔乾淨？自己攞把扇出嚟撥。我打畀梅姐（梅艷芳）求救，梅姐叫我帶Danny去搵佢，行到一半唔見佢，佢標出馬路跳舞！當時我諗係咪哥哥（張國榮）崛起令佢心理唔平衡？𠵱家自己47歲理解到，佢用萬劫不復方法麻醉自己，我喺佢身上學到藝人最重要控制EQ，否則好大鑊。
黃柏高（公司同事）：
Danny係我恩人，佢畀機會我參與錄音製作，畀機會我處理《漣漪》呢隻碟。佢畀我最大啟發，原來錄音時掌握唔到感情，要飲一兩pack白蘭地至唱歌，係佢引導我飲酒。佢酒量唔好，但鍾意飲，早30幾年前已經識品嚐香檳嘅潮人，佢重返華納最失意嘅時候，成日麻醉自己去DD飲酒，我都有陪佢希望開解佢，嗰時佢樣樣都要求高，所以鬱鬱不歡。
陳潔靈（麻雀腳）：
雖然我同張國榮係好朋友，但同Danny都好熟。其實Danny同張國榮一樣，將自己逼到去角落，出唔番嚟，佢哋兩個都過唔到呢一關。Danny有啲嘢冇得勸，佢係因為放縱，盛氣青年，當時佢得30幾歲，就算你點話畀佢聽，點樣勸解佢，佢都聽唔入耳，所以我唔會勸佢囉，有啲嘢係經驗，要自己去面對，可惜佢解決唔到。
鄭國江（填詞拍檔）：
我幫Danny寫過好多歌，《眼淚為你流》、《等》、《相思河畔》、《偏偏喜歡你》、《漣漪》。佢係好可愛嘅男孩子，要求好高，好似錄《等》，佢話「苦困」發音唔好聽，自己改咗做「哀困」，佢有好多意見擺歌裏面，自己最深刻印象同佢寫第一首歌《眼淚為你流》，佢天生嗓子好有感情，而《相思河畔》係我為佢度身訂做，覺得好啱佢畀人嘅感覺。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！