港股失驚無神由高位插水500點，今次火頭來自阿爺──內地拆息突然抽高，有指由於接近交稅季節，加上人行近日未有出手進行逆回購，令銀根出現緊張。姑勿論如何，喺三中全會前出現健康調整，絕對唔係壞事，戰友可以搵心儀板塊重心出擊。
憧憬儲局暫緩退市，地產股噚日逆市造好。近日地產商為谷新盤，紛曲線為買家畀辣招稅，效果理想。一手銷情旺場，二手市場有望轉活，美聯集團（1200）有望受惠。齋睇圖，美聯走勢肉酸到冇朋友，卻因此有平貨執。早前主席黃建業亦有出手增持，價格介乎2.9至3元，與現價3.05元差不多，信主席眼光，不妨設止蝕位小注買入，股價一旦反彈，肯定唔嘢少。
新銳明日上市望多眼
另一方面，近期藥股勢不可擋，明日上市嘅新銳醫藥（8180），絕對值得關注。新銳由康健國際（3886）分拆出來，主要於浙江從事醫藥分銷業務。
睇番近期兩隻全配售藥股同仁堂國藥（8138）及御藥堂（8185），現價與其開市價比較，依然有可觀升幅，新銳肯定惹來資金追捧。集團歷史市盈率8.4倍，平絕同業，加上市值僅2億銀，可塑性甚高。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange