鍾楚紅昨日在中環出席香檳Cristal及其餐廳開幕禮，紅姑一身紅色Isabel Marant西裝、坐着圓形旋轉餐枱拿着香檳出場，甚具氣派。
「留番拍電影」
剛從法國工作回港的紅姑，笑言今次旅程遇到的俊男由A到Z，法國男士有浪漫又有靚仔，在當地有艷遇嗎？她笑說：「太趕，要慢慢，都唔使啦，留番同啲俊男拍電影。」
記者笑紅姑先要肯拍戲，她笑謂還未遇到合適劇本，不少俊男正待她出山拍戲，她聽罷即笑說：「咁多俊男，城城、嘉穎、余文樂、Chilam，好多喺手。」問紅姑挑選哪個？她說：「全部都靚仔，全部都要。」發哥呢？「都預埋，同佢拍咗好多。發哥都靚仔，唔同年代有唔同靚法。」
不惜做咕哩
此外，紅姑即場與大廚炮製沙律，她說：「我不時不食，好鍾意新鮮，食材只要新鮮就好好味，所以我鍾意有機，自己有種香草，用嘅時候摘落嚟，唔使買。」更謂法國之行為了食，十足「咕哩」：「我去工作兩日，自己留咗一日，訂唔到想去嘅餐廳，不過去咗超級市場買到牛肝菌。通常我去法國都會買食材 自己整，今次帶定個篋，好似咕哩。」
採訪：林嘉慈
攝影：陳順禎
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！