無綫藝員歌唱比賽《星夢傳奇》播出後，吸引咗唔少觀眾關注，決賽嗰晚超過23萬觀眾投票，選出佢哋心目中嘅冠軍，成績非常理想。前日無綫仲發咗個聲明，公佈由10月31日起，委任星煥高層何哲圖出任「星夢娛樂有限公司」嘅CEO，仲有傳曾經參加《星夢》嘅藝員將被邀加盟，實行「肥水不流別人田」。無綫行政主席梁乃鵬決定喺呢個月30號，喺電視城嘅西餐廳設宴，請晒班曾經參加過嘅星夢藝員同幕後員工食飯，慰勞吓佢哋。
之前無綫同類型嘅音樂節目《超級巨聲》喺比賽之後，喺紅館幫巨聲幫搞咗個騷，據聞星夢幫都希望公司可以幫佢哋一嘗上紅館嘅滋味，所以有計劃喺飯局嗰晚，向梁博士同相關人士傾吓。馮仁昭噚日打畀王君馨（Grace）同林子博，Grace聽完笑話：「呢個係好多人嘅夢想，我哋會試吓搵機會同公司講，如果成事梗係開心喇！」啱啱出咗首新歌嘅Grace，話好多朋友都讚好聽：「我呢排愛咗寫MV故事，會努力儲多幾首歌，你知做藝人好被動，萬一機會嚟到，都叫做有啲準備。」
鄭世豪結婚
林子博亦話：「呢個都係我哋星夢幫最希望做到嘅事，如果有機會，梗係請埋啲評判一齊做嘉賓。」另外，有報道話鄭世豪會喺12月同圈外女友結婚，佢話：「我哋拍拖幾年，佢一直都好支持我，所以一早認定佢係我太太。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！