有「深圳李嘉誠」之稱嘅內地富商黃楚標噚日以其他商務繁忙為由，退任信置（083）與同系信和酒店（1221）嘅獨董職位。咁都啱嘅，根據2011至2013年年報，兩間公司每年舉行4次董事局常規會議，黃楚標嘅出席率係零，應該都真係好忙。
應承做獨董，但係唔開會，黃楚標可能擔心小股東群起反對佢連任，於是先下手為強，唔再尋求連任獨董，加上佢早排正式成為DBC數碼電台大股東，肯定仲忙啦，辭任獨董都合理。
信置依然喺通告感謝黃楚標對「公司作出寶貴貢獻及睿智建議」，黃楚標係咪私底下經常約埋主席黃志祥同埋其他董事獻計呢？
黃永光連任董事
小股東力量的確不容忽視，噚日股東會上，雖然黃志祥阿仔黃永光成功連任董事，但都有15%反對票，睇嚟準備接棒嘅黃永光要加倍努力喇。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange