由「女股神」變為「女燈神」嘅西京投資主席劉央，絕迹新股市場一段時間，噚日風騷地重出江湖，出席一隻新股嘅投資推介會時，分享炒科網股嘅心得，又笑住呻，話自己三入三出「股王」騰訊（700），沽早咗，打算伺機翻兜咁話。
劉央早年靠投資民企打響名堂，可惜近年撞正民企風暴，愛股人和（1387）、銀基（886）勁跌，中金再生（773）仲俾證監會清盤，搞到佢老人家都好少高調現身新股推介會，對上一次應該係舊年底招股嘅人保（1339）。然而，集資最多13億元嘅醫藥股普華和順（1358）噚日舉行推介會，竟然吸引到劉央。
心郁郁想翻兜
佢又大談投資心得，話近排睇好醫藥、科網股，講到興起，自爆「三入三出」騰訊，走咗呢隻股三轉應該幫佢賺咗唔少錢，不過佢就笑住口呻，話好後悔最後一次喺420蚊沽咗，講嗰陣表情仲好似有啲揼心。
雖然劉央仲心郁郁想買番騰訊，但係睇現價已經升到430蚊，𠵱家入市，好似有啲危險。佢明白呢點，但係一定會繼續留意，一有機會一定會再翻兜咁話。
講起騰訊，自然提埋阿里巴巴，對於俾全城鬧爆嘅合夥人制，劉央就冇直接表態，只係話買股票，最緊要都係睇管理層質素，而且阿里巴巴行業前景好好。照咁睇，劉央有暗撐馬雲嘅意思喎。
李華華
mailto:[email protected]
足本收睇《亂噏24》x陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24