噚日本報有篇新聞，題為「沙田第一城 300萬有找」，唔使一陣已經有過萬hit rate。實用面積300幾呎，即係成萬蚊一呎，但大家都已經好似覺得，「嘩，好平啦！」香港樓市係咪畸形呀……
所以，本欄強烈認為，屋企入面有兩樣傢俬係勁重要的，就係床褥同梳化！早幾日買咗張「芝華仕」（CHEERS）梳化，雖然比其他仿皮梳化貴幾千蚊，但的確係物有所值，返工咁辛苦，一定唔可以待薄自己！
花旗目標價15.5元
芝華仕就係敏華（1999）旗下最具影響力嘅品牌，該股分別喺9月發盈喜，繼而10月再發多一次，講到明預計中期盈利增加一倍，刺激股價逼近2011年1月高位。
花旗發表報告指，敏華受多方面引擎推動，如歐美銷售強勁、加快拓展內地零售市場和開店速度超預期，以及有效控制成本，預計上半年多賺逾九成至4.24億元，全年盈利有望達8.51億元，按年升五成。
不過，敏華早前引入鼎暉及華夏基金認購總值8.5億元可換股債券，花旗指，根據認購協議，兩基金可能會轉換CB，故敏華股價或進入整固階段。
若真的如此，投資者可以趁低位吸納，上望目標價15.5元，現價仍有一成半的上升空間。
最近三藩市聯儲報告指，若美國樓價持續上漲，美國樓市銷售有望升溫，對敏華亦是利好消息。
根據彭博綜合報告，七成半券商建議買入，敏華前景看高一線！
瑪姬兒