【圓方、土瓜灣】拍荷李活電影好處多到講唔晒，人工高唔在講，仲可以出埠拍外景都有得休息兩日，對香港片嚟講真係天方夜譚。前日喺香港取景嘅電影《變形金剛4》（Transformers 4）停工，電影公司仲專登喺圓方Ritz-Carlton酒店118樓嘅Ozone酒吧，包咗半個場畀員工飲酒作樂同聯誼。大概9點鐘左右一班工作人員陸續嚟到，男主角麥克華堡（Mark Wahlberg）、新變形女18歲嘅Nicola Peltz、早前拍戲仆低受傷嘅Sophia Myles同內地演員趙茜稍後到場。
李詩韻密會新歡
麥克華堡一到場就吸引咗工作人員輪流搵佢影合照，雖然佢都冇抗拒，但就面黑黑唔係好高興，坐咗半個鐘就率先離開，不過佢都有同趙茜傾咗一輪偈。反而着住迷你裙嘅變形女玩得好投入，不停同在座工作人員影相，仲即刻睇相玩得不知幾開心。
另外，律師清洪契仔巫翊鳴同李詩韻前晚都結伴去咗OZONE幫襯，飲到一半巫翊鳴仲想借意走入去《變4》個場，最後當然唔成功，之後好冇癮咁同李詩韻再飲咗一陣嘢，可能知道樓下有記者，佢哋刻意分前後門離開。其間樂基兒都約咗班朋友喺圓方聚會，離開嘅時候好抵死攬住位女性友人影相。
變形女遊大嶼山
另外，噚日下晝1點左右，Nicola離開酒店坐車去到金鐘，接載咗一名外籍女友之後，原車返回酒店，其實大前日佢趁住休息去咗大嶼山觀光，睇大佛同去大澳行名勝。而《變4》工作人員噚日喺土瓜灣一幢舊樓作最後佈置，準備今日拍一場爆炸戲。
採訪、攝影：陳辰、朱志聰、王崇穎、黃文偉、梁繼光
足本收睇《亂噏24》x陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24