689得罪晒平時唔講政治的姨媽姑姐，令口口聲聲「我討厭政治」的女藝人隨時冇得撈。試問，點會順氣撐狼。
少個碼頭泊，維港少條船，梁營以為，就不會有第二樁十一海難發生？維基這條船，不是南丫N號，想一撞打沉，冇咁容易。維基號變身維京號，加大馬力，跟梁營拼過，到時，政總有冇水密門都死，門常開日日直播即興劇，市民去草地電視送飯，廚餘四散，政總大樓，吸引老鼠家族，狼鼠同路，政總從此迪士尼化，玩玩吓，食住牛腩睇煙花，零公信力；狼一張口，全民轉台。
「英基惡鬥」，乃「一男子因素」作怪。這一年，城中一哥一姐自我感覺太過良好，對周邊風浪無視，把臨界點當做耳邊風。環顧政總之內，負資產濟濟一堂，冇個肩膊可以依靠，船長只顧自己「部署」，船員爭功卸責熱衷「禮尚往來」。梁營總動員硬銷的「家是香港」，諷刺得很，這一個家，親疏有別，睇電視都要強制三揀二。正香港人拒絕雞汁撈丁，只能熄機，谷住道火，香港精神，家變在即！