無綫成立唱片部星夢娛樂有限公司力捧自己友，噚日公佈委任星煥高層何哲圖出任CEO，兩間公司合併，星煥歌手會加入星夢，據知本身係無綫親生女嘅鍾嘉欣取代謝安琪（Kay）做一姐，星夢冠軍鄭俊弘當然做硬一哥，師兄許廷鏗要屈居阿二。
閉門一家親
何哲圖係無綫非戲劇製作總監余詠珊嘅老公，星煥同無綫一直關係密切，今次更加閉門一家親，噚日馮仁昭打電話畀何哲圖，佢話：「當然好高興加入星夢，星煥資源會注入星夢，包括台前幕後。」星煥旗下嘉欣、許廷鏗、胡鴻鈞同樂瞳都係無綫人，至於Kay、鄭欣宜同Super Girls就只有唱片約，問係咪全部歌手過檔？何哲圖話：「再開會傾，遲啲會公佈。」何哲圖強調合併同太太冇關，亦唔怕《勁歌》頒獎禮俾人話偏幫自己友：「無綫講咗嚟緊《勁歌》總選會一人一票。」
身在意大利拍無綫特輯嘅鄭俊弘話：「未知呢件事，如果係嘅話梗係開心，最緊要有得唱歌。」至於做一哥，佢話：「我只係新人，仲有好多學習空間，會繼續努力做好自己。」喺大陸嘅Kay就透過經理人話：「何哲圖今日通知轉變，恭喜佢，我哋合作好開心，會繼續合作。」擔唔擔心畀嘉欣取代做一姐？佢話：「公司唔止一個好歌手，唔會大細超。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！