喺現實生活中即將加入師奶行列嘅滕麗名，最近喺無綫賀歲劇《新抱喜相逢》裏面，先嚟一個婚禮預演，前日下晝阿滕同埋老公麥長青（麥包）、薛家燕、羅莽，仲有李泳豪同魏焌皓等人，着晒婚紗禮服喺油麻地果欄開工，拍攝一場講麥包接新娘嘅場面。
阿滕同麥包已經拍過無數次呢類結婚戲，今次對佢哋嚟講簡直易過借火，唔知係咪呢個原因，麥包去到冇耐，已經輕輕鬆鬆咁周圍行，跟住又走咗去啲攤檔度同老闆吹水兼影相，攤檔老闆好識做，仲送咗一大袋桃、提子等幾種生果畀麥包，之後麥包就同啲演員、工作人員，有福齊齊享，有生果齊齊食喇！
家燕姐狂試食
跟住出現嘅係同樣有食神嘅家燕姐，佢亦都深受檔主歡迎，唔單止好多人搵佢影相，仲有檔主即場切啲靚生果畀家燕姐試食，最後連阿滕都忍唔住手，着住白色婚紗嘅佢埋去攤檔度揀埋一份，喺現實生活都幾難見到有新娘連婚都唔結住，施施然喺度揀生果，場面都幾搞笑。
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！