政府拒絕發牌畀港視引爆出來嘅電視風雲扣人心弦。原來喺35年前，香港廣播史上都發生過一宗轟動全港嘅電視風雲。1978年8月，佳藝電視突然倒閉，百幾名失業員工上街示威。據當時喺佳藝任職資料搜集經理嘅林旭華憶述，當年佢同另外三位同事公民抗命，喺未經申請之下去灣仔遊行，結果俾警察拘捕，罪成每人罰款2,500蚊，相當於佢四分一月薪。
林旭華慨嘆，佳藝事件同家陣嘅港視風潮有啲共通點。首先，當年港英政府對佳藝主要股東林炳炎家族嘅資金來源有所懷疑，傳聞家族同內地有密切聯繫，政府唔想紅色資本喺一間香港嘅電視台擁有決策權。情況就似外間相信特首梁振英基於政治理由，拒絕向王維基發牌一樣。
林旭華仲話，佳藝年代直至𠵱家，導致無綫獨大、弱勢電視台冇生存空間嘅最大元凶，係香港人自己：「電視觀眾咁盲目，幾無聊嘅節目都睇，廣告商自然繼續支持強勢嘅台，弱勢嘅台就算幾有創意，都會失敗。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange