喺去年特首選舉以「金句王」稱霸嘅前政務司長唐英年，以一句「你呃人」名留青史。噚日唐唐出席一個活動大談酒經，披上「紅酒專家」戰衣，唐唐可謂魅力四射，平日詞不達意嘅佢，突然變得言簡意賅，風趣幽默，仲「以女喻酒」，𠱁到在場過百人士又笑又拍掌。
彈官式宴會酒唔靚
唐唐出席菁英會文化藝術研究會成立典禮，同場加映「茶酒香論壇」，由唐唐打頭陣講酒。「紅酒教主」唐唐由淺入深，話點解一講酒，大家都會先講紅酒，唔係白酒呢？唐唐話，除咗因為紅酒顏色靚，仲有係因為紅酒容易分靚同唔靚，白酒就較難分辨，平與貴嘅白酒差異唔大。而逢係佢搞嘅party，一定有靚酒飲，仲mean到爆話佢平日出席嘅官式宴會，啲酒唔慌靚。
佢又話，好多人一開始飲酒，都係飲波爾多，波爾多分左岸同右岸，有乜嘢分別？唐唐以女喻酒，話右岸以Merlot為主，味道如性感女人，「容易吸引人，容易了解」。左岸以Cabernet Sauvignon為主：「硬淨啲、結構靚啲，唔係一飲就會好欣賞」。對酒一竅不通嘅人，飲Merlot就最好，因為容易入口兼戀上。唐太郭妤淺係「左岸」定係「右岸」先？要佢以酒喻妻，唐唐好識做話，「佢兩樣都係！」
唐唐飲酒有乜嘢偏好？佢鍾意飲偏凍嘅酒，溫度12度就最好，廿幾度嘅紅酒好難飲。佢唔鍾意飲太舊年份嘅酒，皆因酒味充滿生氣先好飲。而佢最鍾意就係Burgundy嘅Pinot noir，話呢隻酒充滿花香。佢又話，如果真係要投資，Burgundy幾乎係有升無跌，但佢就唔支持炒酒，話酒係要分享先好飲。
唐英年談酒經金句
1. 「最好唔好炒（酒），我買酒係同朋友去飲，同太太分享。好飲嘅酒要同朋友分享，支酒會更好飲。」
2. 「我出席好多官式宴會，通常啲酒都唔會靚，除咗我自己嗰啲宴會，因為我會用我自己嘅酒。」
3. 「我好多紅酒係儲存喺外國，平時唔覺咁多，直至我行吓自己個酒倉，睇到先至『嘩！』一聲，多到成世飲唔完，結交好多朋友都飲唔完。」
4. 「我唔鍾意飲啲太過舊嘅酒，因為我鍾意啲酒，仍然係生氣勃勃。例如1995年嘅Latour。」
mailto:[email protected]
足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24