熱刺翼鋒安祖斯唐辛呢排真係勁到着火兼出煙！佢先喺早前嘅世盃外，為英格蘭處子登場就入波，幫國家隊打入決賽周；之後熱刺就急急腳加佢人工，嚟到星期日，仲係佢職業生涯中，首度幫熱刺取得英超入波，作客以2:0擊敗阿士東維拉。
有時人好運起上嚟真係擋都擋唔住，31分鐘，唐辛喺右路用左腳傳中，禁區入面嘅蘇爾達杜出腳，賀治比就出頭，結果兩個都掂唔到個波，最後唐辛呢腳傳中直入維拉龍門，幫熱刺領先1:0；呢位22歲英格蘭新貴就話：「呢球真係傳中嚟，我冇諗住將功勞攬上身，但當我諗到以前黑氣纏身，既然𠵱家時來運到，我應樂於接受。最緊要呢個入波幫到球隊拎3分。」
「英超開齋」助熱刺贏2:0
唐辛成名前借過去9間球會，真係經歷過好多辛酸先有今日，同埋佢都好謙厚咁話：「呢排係我人生中最如意嘅幾個星期！為國家隊首次上陣就入波，肯定係我職業生涯嘅精采一刻，但第一次為家鄉球會喺英超建功，感覺亦十分特別。𠵱家最重要係，我唔可以被勝利沖昏頭腦，腳踏實地，認真面對每次機會。」
加埋蘇爾達杜埋齋，呢場波熱刺贏2:0；領隊波亞斯賽後讚口不絕，但唔想傳媒將唐辛同加里夫巴利相提並論：「對於唐辛嚟講，只係啱啱起步；而巴利上季就係我哋不可或缺嘅成員。當然，唐辛一向勇敢，比賽前唔會驚。佢將國家隊嘅表現帶返嚟，值得大家讚賞。」
煙炮掟中旁證有餘波
呢場波有個小插曲，唐辛入波冇耐，有球迷喺看台用煙炮掟旁證戴域拜仁，仲好好眼界咁中咗後頸，戴域拜仁好堅、好專業，繼續執法到完場。事後，警方拘捕咗兩位熱刺球迷，分別係25同47歲。英足總話會徹查事件；而波亞斯亦冇偏袒熱刺球迷，指摘呢種行為係唔容許喺球場上出現。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange